«Ալրաղացի Լյովիկ» անունով հայտնի Լևոն Սարգսյանի գործով այսօր դատարանում ցուցմունք տվեց Մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակման գործով դատապարտված Արսեն Սողոմոնյանը: Վերջինս Հայաստանում տեղի ունեցած իշխանափոխությունից հետո ցուցմունք է տվել Ավետիսյանի տան վրա հարձակման գործով, տվել Լևոն Սարգսյանի անունը` որպես ավազակային հարձակման  կազմակերպիչ, ապա ամիսներ անց պայմանական վաղաժամկետ ազատ արձակվել:

Հիշեցնենք, որ 2008 թվականին ավազակային հարձակում է տեղի ունեցել Մաքսային պետական կոմիտեի նախկին պետ Արմեն Ավետիսյանի տան վրա։ Այս գործով 2011 թվականին տասը անձ, որոնց թվում՝ Արսեն Սողոմոնյանը, Արա Կարապետյանն, ով հայտնի է «Կոշիկի Արո» մականունով, Արմեն Նիկողոսյանը մեղավոր են ճանաչվել և դատապարտվել։ Տարիներ առաջ քննված քրեական գործում Կարապետյանն ու Նիկողոսյանը ներգրավված են եղել որպես հանցագործության կազմակերպիչ: Վերջիններս ևս իշխանափոխությունից հետո են ցուցմունք տվել Լևոն Սարգյանի դեմ, ապա կարճ ժամանակ անց պայմանական վաղաժամկետ ազատ արձակվել:

Արսեն Սողոմոնյանը չցանկացավ, որ լրագրողները դատական նիստը տեսանկարահանեն, հրաժարվեց նաև ցուցմունք տալ, սակայն կողմերի հարցերին պատասխանեց:

Սողոմոնյանի տված պատասխաններից պարզ դարձավ, որ նրա՝  դատարանում հայտնած տեղեկություններն ու նախաքննության ընթացքում տված ցուցմունքները չեն համապատասխանում միմյանց, դրանցում էական հակասություններ կան:

Մասնավորապես՝ եթե Սողոմոնյանի նախաքննական ցուցմունքներում Լևոն Սարգսյանը մատնանշվում է որպես ավազակային հարձակման կազմակերպիչ, ապա դատարանում Սողոմոնյանը պնդեց, թե Սարգսյանի հետ որևէ առնչություն չի ունեցել, նրա անունը չի շոշոփվել, ավելին, եթե իմանար, որ որևէ մեկն, այդ թվում` Սարգսյանն, ավազակային հարձակման հետ որևէ առնչություն է ունեցել ու ազատության մեջ լինելով՝ իրենց մենակ է թողել, անգամ մի «սիգարետ չի ուղակել», անպայման համապատասխան քայլեր կձեռնարկեր:

Այժմ Լևոն Սարգսյանի հետ ամբաստանյալի աթոռին է նաև վերջինիս քրոջ ամուսինը՝ Սուրեն Ղազարյանը: Սողոմոնյանն ասում է՝ նրան ևս նախկինում չի ճանաչել, բայց նախաքննական ցուցմունքներում նաև նրա անուն է տվել՝ որպես հանցագործությանն առնչություն ունեցող անձի:

Սողոմոնյանը բացատրեց, որ նախաքննության ընթացքում Սարգսյանի և Ղազարյանի դեմ ցուցմունքի տակ ստորագրել է՝ առանց դրա բովանդակությանը ծանոթանալու: Ըստ դատապարտյալի՝ իրեն ասել են, որ եթե ստորագրի, ազատ կարձակվի:

Ըստ Սողոմոնյանի՝ ինքը կալանավայրում բազմաթիվ «քսիֆ»-ներ է ստացել, որոնց բովանդակությունն ու ուղարկողի անունը չտվեց, հայտնեց, որ կալանավայրում գտնվելու ընթացքում իրեն որդին է  տեսակցել, տարիներ առաջ հանցագործությունը կազմակերպած անձի անունից առաջարկել, որ ստորագրի փաստաթղթի տակ և ազատ արձակվի:

Դատապարտյալն, իբր, փորձում էր չբացահայտել, թե տարիներ առաջ տեղի ունեցած հանցագործության կազմակերպիչ ասելով՝ ում նկատի ունի, բայց դատավարության մասնակիցների համար պարզ էր, որ խոսքը Արա Կարապետյանի մասին է: Շուտով Լևոն Սարգսյանի պաշտպան Աշոտ Սարգսյանը ուղիղ տվեց Կարապետյանի անունը, և Սողոմոնյանը չհերքեց, որ խոսքը նրա մասին է:

«Ասին՝ էս թուղթը ստորագրում ես, վաղը էթում ես տուն»,- պատմեց Սողոմոնյանն ու դժգոհեց, որ իրեն խաբել են, թուղթը ստորագրել է, ապա տարել են «Նուբարաշեն»: Միայն 9 ամիս անց՝ Վերաքննիչ քրեական դատարանի որոշմամբ է ազատ արձակվել:

«Մեռնեմ էդ վերաքննիչ դատավորի ջանին, առաջին ատյանի դատավորը չթողեց»,- ասաց Արսեն Սողոմոյանը: Վերջինս անազատության մեջ գտնվելու ամիսներին անգամ ԱԱԾ քննչական դեպարտամենտի այն ժամանակվա պետ Միքայել Համբարձումյանին դիմում է գրել, որպեսզի վերջինիս միջամտությամբ իրեն ազատ արձակեն, իր «խախտված իրավունքները» վերականգնվեն: Դատարանում բացատրեց, որ, փաստորեն, իրեն ազատ արձակելու խոստումը Համբարձումյանի աշխատակիցներն են տվել, այդ պատճառով էլ պահանջել է, որ «ասածներն անեն»:

Դիմումից մոտ երկու ամիս անց Սողոմոնյանն ազատ է արձակվել:

Դատապարտյալն ասում է՝ եթե անգամ իրեն ներկայացված փաստաթղթի վրա գրված լիներ, որ սպանություն է կատարել, կստորագրեր, քանի որ անազատության մեջ գտնվելու տարիներին բազմիցս դիմել է՝ պայմանական վաղաժամկետ ազատ արձակվելու համար, սակայն իրեն ազատ չեն արձակել:

Նախաքննության ընթացքում Արսեն Սողոմոնյանը առերեսվել է այժմ ամբաստանյալի կարգավիճակ ունեցող Սուրեն Ղազարյանի հետ: Այս հարցաքննության ժամանակ ցուցմունք է տվել այն մասին, որ Արա Կարապետյանն իրեն ասել է, իբր գործի գլխին շատ մեծ մարդիկ էին կանգնած` պատգամավորներ, որոնցից մեկն էլ «Ալրաղացի Լյովիկն» է, ուստի որ բռնվեն, շուտ դուրս են գալու:

Ստացվում է, որ առաջին անգամ ինչ-որ փաստաթղթի տակ, առանց դրա բովանդակությանը ծանոթանալու, ստորագրելուց բացի Սողոմոնյանը նաև առերես հարցաքննության ժամանակ է տվել Լևոն Սարգսյանի անունը` որպես հանցագործության կազմակերպչի: Դատարանը հարց ուղղեց Սողոմոնյանին, թե այս հանգամանքն ինչպե՞ս է բացատրում: Տևական ժամանակ հարցի ուղիղ պատասխանը չտալուց հետո Սողոմոնյանն ասաց, որ ինքը իմացել է, որ պետք է տեղեկություն հայտնի այն մասին, որ Արա Կարապետյանն իրեն նման բան է ասել:

«Էս մարդկանց իզուր եք դատում»,- դատարանին դիմելով` ասաց Սողոմոնյանն ու պնդեց որ իր` դատարանում հայտնած տեղեկությունը ամբողջությամբ ճիշտ է, ինքն արդեն ո՛չ քաշվելու բան ունի, ո՛չ վախենալու, ոչ էլ բանտում է, որ մտածի` չստորագրի, գլխին ինչ-որ  բան կսարքեն:

Սողոմոնյանի հարցաքննությունն ավարտվեց, հաջորդ դատական նիստը նշանակվեց հոկտեմբերի 28-ին:

Լուսանկարում ձախից` Լևոն Սարգսյանը