Վարչապետի դժգոհությունը տեղին է։ Այս մասին Կառավարության նիստից հետո լրագրողների հետ ճեպազրույցում հայտնեց Առողջապահության նախարար Անահիտ Ավանեսյանը։

Հիշեցնենք, որ Կառավարության նիստում վարչապետը դժգոհեց պատվաստման գործընթացից և հրահանգեց կիրառել բոլոր լծակները՝ ընդունել անհրաժեշտ իրավական ակտեր և իրականացնել պատվաստման գործընթացը։

«Պետք է անենք ամեն ինչ, որ պատվաստման ցուցանիշները հասցնենք մեր թիրախային կետերին։ Վարչական և օրենսդրական փոփոխությունները արված են, առաջիկայում կտեսնենք՝ ինչ լրացուցիչ միջոցներ պետք է կիրառենք, որպեսզի քաղաքացիները պատվաստման ընթացքին ավելի ակտիվ մասնակցեն։

«Բնակչության սանիտարահաճարակային պաշտպանության մասին» օրենքով հստակ պարտադիր պատվաստումներ կետը նախատեսված է, բայց, ինչպես գիտեք, հոկտեմբերի 1-ից ուժի մեջ է մտել սահմանափակումների որոշակի փաթեթ»,- նշեց առողջապահության նախարարը։

Ավանեսյանը վստահ է, որ Առողջապահական և աշխատանքի տեսչական մարմնի վարչական ռեսուրսները բավարար են, նրանք խստորեն կհետևեն սահմանված պայմանների կատարմանը։

Նրա խոսքով՝ «Մոդեռնա»-ով պատվաստումը վաղվանից կիրականացվի։

Անդրադառնալով պատվաստումերի թվին՝ նախարարը հայտնեց, որ Հայաստանում բնակչության 14%-ն արդեն իսկ ստացել է առաջին դեղաչափը, իսկ եվրոպական մի շարք երկրներ արդեն 90%-ից ավել պատվաստում են իրականացնել։

«Շատերը ներկայացնում են որոշակի հակացուցումների իրենց պատկերացումը, որ, օրինակ, ունեն շաքարային դիաբետ, ասում են՝ պատվաստումն ինձ ցուցված չէ, բոլոր այն արգումենտները որ հնչել են, ի վերջո, պարզվել է, որ դրանք պատվաստման ուղիղ ցուցում են։ Ես չեմ կարծում, որ խոսքը վարչապետին ուղիղ դիմելու մասին էր, այլ՝ հարցը բարձրացնելու»,- նախարարն այսպես մեկնաբանեց վարչապետի այն խոսքը, թե Կառավարությունում իրեն միջնորդում են՝ ասելով, որ կան մարդիկ, որոնք վախենում են պատվաստումից։