Հայաստանն ու Իրանը Լեռնային Ղարաբաղի տարածքն օգտագործել են դեպի Եվրոպա թմրանյութեր փոխադրելու համար։ Այդ մասին ԱՊՀ երկրների ղեկավարների խորհրդի նիստի ժամանակ հայտարարել է Ադրբեջանի նախագահ Իլհամ Ալիևը։ Ըստ նրա՝ 30 տարի շարունակ Հայաստանն ու Իրանը Ջրականի (Ջաբրայիլ) և Կովսականի (Զանգելան) շրջաններն օգտագործել են թմրանյութերի անօրինական տեղափոխություն կազմակերպելու համար։

«Այն բանից հետո, երբ Ադրբեջանը վերականգնեց վերահսկողությունն Իրանի հետ պետական սահմանի 130 կիլոմետրանոց հատվածի վրա, որը մոտ 30 տարի եղել է Հայաստանի վերահսկողության տակ, մենք պատնեշ ենք դրել Իրանից Ջաբրայիլի շրջանով դեպի Հայաստան, իսկ այնուհետ Եվրոպա թմրանյութերի փոխադրման երթուղու վրա։ Ադրբեջանա-իրանական սահմանի ընդհանուր երկայնքով մեր կողմից բռնագրավված հերոինի ծավալները երկու անգամ աճել են նախորդ տարիների նույն ժամանակահատվածի հետ համեմատած»,- հայտարարել է Ալիևը։ Ըստ նրա՝ մոտ 30 տարի Հայաստանն ու Իրանը պայմանավորվածություն են ունեցել այդ շրջաններով Եվրոպա թմրանյութ փոխադրելու շուրջ։

Ալիևին իր ելույթում հակադարձել է վարչապետ Նիկոլ Փաշինյանը։ Նրա պնդմամբ՝ Հայաստանն ու Իրանը համատեղ պայքարում են թմրանյութերի միջազգային թրաֆիքինգի դեմ։ «Մենք շատ սերտորեն աշխատում ենք Իրանի իրավապահ մարմինների հետ և արդյունավետորեն պայքարում ենք թմրանյութերի ապօրինի շրջանառության դեմ: Մենք կարող ենք նաև թվեր ներկայացնել թմրանյութերի փոխադրման փորձերի կանխման ու առգրավված թմրանյութերի ծավալների մասին, որոնք պատերազմից հետո 3-4 անգամ ավելացել են»,- հայտարարել է Փաշինյանը՝ նշելով, որ այդ ցուցանիշները վկայում են, որ Հայաստանի ու Իրանի իրավապահները արդյունավետ պայքարում են թմրանյութերի ապօրինի շրջանառության դեմ։

Իր ելույթի ընթացքում Ալիևը խոսել է նաև ռազմագերիների մասին՝ դարձյալ պնդելով, թե պատերազմի ընթացքում գերեվարված բոլոր հայ ռազմագերիներին Ադրբեջանը փոխանցել է Երևանին։ «Ադրբեջանը փոխանցել է բոլոր ռազմագերիներին շատ ավելի վաղ, քան Հայաստանը մեզ կփոխանցեր ադրբեջանցի ռազմագերիներին»,- նշել է նա։

Ալիևը կարծում է, որ շիրակցի գերիները, որոնք գերեվարվել էին նոյեմբերի 9-ի հայտարարության ստորագրումից հետո, «միջազգային կոնվենցիաների համաձայն չեն կարող ռազմագերի համարվել»։ Ալիևը շարունակել է պնդել, որ նրանք Բաքվի համար դիվերսանտներ են։  

Հիշեցնենք, որ շիրակցի գերիների նկատմամբ Բաքուն շինծու գործեր էր սարքել։ Նրանցից շատերը Բաքվում դատապարտվել են 5-6 տարվա ազատազրկման, որից հետո կարտաքսվեն այդ երկրից։

Լուսանկարը՝ РИА Новости-ի