Գյումրու ավագանու ընտրություններին թիվ 31/11 ընտրատեղամաս ոստիկաններ էին ժամանել քաղաքացու՝ ժամը 12։00-ի ահազանգով։ Քաղաքացին տեղեկացրել էր՝ նկատել է, որ դպրոցի ցանկապատերի վրա, շուրջբոլորը փակցված են «Քաղաքացիական պայմանագիր» (ՔՊ) կուսակցության ավագանու թեկնածու, Շիրակի մարզպետ Հովհաննես Հարությունյանի քարոզչական պաստառները։

Դեպքի վայր ժամանած ոստիկանները, տարածքը զննելով, արձանագրեցին, որ խախտում չկա, քանի որ քարոզչական պաստառները փակցված են եղել օրեր առաջ և դեմքով նայում են դեպի դուրս։

Ընտրատեղամասի հանձնաժողովի նախագահ Քրիստինե Սարոյանը մեր հարցին՝ արդյոք առավոտյան ընտրատեղամաս մտնելիս չէ՞ր նկատել ցանկապատի պաստառները, պատասխանեց, որ նկատել էր, և մեջբերեց ոստիկանի խոսքերը, որը խախտում չէր տեսել։