Հայաստանը պատրաստ է սկսելու դելիմիտացիայի և դեմարկացիայի նախապատրաստական փուլի հանձնաժողովի աշխատանքները
Հայաստանը պատրաստ է սկսել դելիմիտացիայի և դեմարկացիայի նախապատրաստական փուլի հանձնաժողովի ձևավորման գործընթացը` ի պատասխան Ռուսաստանի Դաշնության առաջարկի:
Այս մասին խորհրդարանական ճեպազրույցներին հայտնեցին «Քաղաքացիական պայմանագիր» խմբակցության պատգամավորները:
Հարցին, թե ինչ բովանդակությամբ առաջարկ է եղել ՌԴ-ից, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն արձագանքեց.
«Խոսքը գնում է զրոյական կետից սկսելու մասին: Եվ ՀՀ-ն տվել է իր համաձայնությունն այդ աշխատանքների սկզբին մասնակցելու համար: Վարչապետը դրա մասին է ասել»:
Արտաքին հարաբերությունների մշտական հանձնաժողովի նախագահ Էդուարդ Աղաջանյանն էլ հավելեց.
«Այդ մասին նաև գրավոր ծանուցվել է Ռուսաստանի Դաշնությունը, խոսքը մեր կողմից համաձայնության մասին է: Այն պահին, երբ որոշակի տեխնիկական հարցերի վերաբերյալ ձեռք կբերվի համաձայնություն, ՀՀ-ն պատրաստ է սկսել հանձնաժողովի ձևավորման գործընթացը և անցնել բուն աշխատանքներին»:
Էդուարդ Աղաջանյանի համոզմամբ` դելիմիտացիայի և դեմարկացիայի արդյունքում ակնկալվում է լուծել Հայաստանի խախտված տարածքային ամբողջականության խնդիրը:
«Ինքնանպատակ չէ Ռուսաստանի ռազմական միջամտությունը, կարևորագույն խնդիր է այս պահին Հայաստանի Հանրապետության սուվերեն տարածքի անձեռնմխելիության ապահովումը: Եվ դեմարկացիան, դելիմիտացիան այն գործիքներից մեկն են, որը կապահովեն այդ արդյունքը»,- ասաց նա:
Անդրադառնալով այն քննարկումներին, թե իշխանական պատգամավորները ՌԴ-ի և ՀԱՊԿ-ի նկատմամբ քննադատություններ են հնչեցնում, պահանջներ են ներկայացնում, Անդրանիկ Քոչարյանն արձագանքեց` իրենք պահանջ չեն ներկայացնում, պարզապես ցանկանում են, որպեսզի պայմանագրի բոլոր կետերը ճիշտ ժամանակին իրականություն դառնան:
«Մեր ինքնիշխան տարածքը ոտնձգության է ենթարկվել, դրա արդյունքում տեղի են ունեցել ռազմական գործողություններ, այնուամենայնիվ, մեր բանակը չի թողել, որ հակառակորդը տարածքային նոր ձեռքբերումներ ունենա»,- ասաց Քոչարյանը:
Հիշեցնենք, որ նոյեմբերի 18-ի Կառավարության նիստում վարչապետ Նիկոլ Փաշինյանը հայտնել էր, որ ՌԴ-ն դելիմիտացիայի և դեմարկացիայի նախապատրաստական փուլի առաջարկ է արել, որն ընդունելի է հայկական կողմի համար:
Մեկնաբանել