Կայացել է Ռուսաստանի Դաշնության նախագահ Վլադիմիր Պուտինի և Եվրոպական խորհրդի նախագահ Շառլ Միշելի հեռախոսազրույցը, որի ընթացքում կողմերը, ի թիվս այլ հարցերի, քննարկել են նաև Արցախում առկա իրավիճակը։ Այդ մասին հայտնում է Կրեմլի մամուլի ծառայությունը։ 

«Շառլ Միշելի խնդրանքով՝ Վլադիմիր Պուտինը տեղեկացրել է Լեռնային Ղարաբաղի վերաբերյալ 2020 թվականի նոյեմբերի 9-ի և 2021 թվականի հունվարի 11-ի եռակողմ համաձայնագրերի դրույթների իրականացման ուղղությամբ ձեռնարկվող քայլերի, ինչպես նաև Հարավային Կովկասում խաղաղության հաստատման, տնտեսական և տրանսպորտային կապերի վերականգնման մասին»,- նշվում է Կրեմլի հաղորդագրության մեջ։ 

Կողմերը քննարկել են նաև երկկողմ և միջազգային օրակարգի այլ հարցեր, այդ թվում Բելառուսում, Ուկրաինայում, Աֆղանստանում և Լիբիայում առկա իրավիճակը։

Հիշեցնենք, որ Վլադիմիր Պուտինը և Շառլ Միշելը, համապատասխանաբար նոյեմբերի 26-ին և դեկտեմբերի 15-ին Սոչիում և Բրյուսելում կհյուրընկալեն ՀՀ վարչապետ Նիկոլ Փաշինյանին և Ադրբեջանի նախագահ Իլհամ Ալիևին, որի ընթացքում կքննարկվի 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների կետերի իրագործման ընթացքը։ Եթե Ռուսաստանի պարագայում հանդիպումը եռակողմ է, ապա Բրյուսելում հանդիպումը տեղի կունենա Արևելյան գործընկերության գագաթնաժողովի շրջանակներում։