Հայաստանի Ագրարագյուղացիական միավորման նախագահ Հրաչյա Բերբերյանն այսօր՝ լրագրողների հետ հանդիպման ժամանակ, հայտարարեց, որ նոր ձևավորված ծիրանի բերքի վրա հայտնաբերվել են սնկային գոյացություններ՝ սև բծեր: Այդ սև բծերը թույլ ձևով արտահայտված են նաև դեղձի վրա:

Հ. Բերբերյանի խոսքերով՝ եթե առաջիկա շաբաթների ընթացքում ևս լինեն տեղումներ, ապա սնկային հիվանդությունը կխորանա: Սնկային հիվանդությունը նկատվել է Արմավիրի և Արարատի մարզերում, մասնավորապես Շահումյան, Աղլիճ, Լճաշեն, Գրիբոյեդով և այլ գյուղերում:

Սնկային հիվանդությունների դեմ պայքարելու համար Հ. Բերբերյանը խորհուրդ է տալիս կատարել համապատասխան սրսկումներ: 1 հա-ի համար դա կարժենա 8-10 հազար դրամ: Սակայն եթե ծառը չբուժվի, մի քանի տարուց կչորանա:

Նրա խոսքերով՝ եթե ծառի բուժումը շուտ կազմակերպվի, ապա այս տարի, նախորդ տարվա համեմատ, փոքր-ինչ՝ 50 հազար տոննայով ավելի բերք կունենանք: Միաժամանակ վտանգ կա, որ բերքատվությունն ավելի քիչ կլինի, որովհետև Հ. Բերբերյանը համոզված չէ, որ բոլոր գյուղացիներն են այդ սրսկումներն անում: Այդ պատճառով էլ պետք է լինի ավիացիոն պայքար:

Հ. Բերբերյանի կարծիքով՝ վերջին շրջանում գյուղնախարարությունը «ուրիշ բանով է զբաղված՝ բացի գյուղատնտեսությունից», այնինչ ոլորտում պետք է կատարել բարեփոխումներ: Գյուղացին ջրով ապահովված է, սակայն ինքը պետք է գնի ջուրը, ոչ թե դա կատարվի միջնորդ կազմակերպությունների միջոցով: Այդ դեպքում ջրի արժեքը կիջնի՝ դառնալով 4.5 դրամ:

Հ. Բերբերյանի խոսքերով՝ մի քանի տարի առաջ գյուղնախարարության բյուջեով նախատեսված է եղել բույսերի պաշտպանության ծրագիրը, որը հանվել է «վայ մասնագետների կամքով». գյուղնախարարությունը չկարողացավ պաշտպանել իր բյուջեն, չեն եղել մասնագետներ, որոնք կառավարությանը ցույց տան իրենց ծրագրերի արդյունավետությունը և ոլորտի խնդիրները:

Հ. Բերբերյանի խոսքերով՝ բերքի 10% կորստի դեպքում պատճառը կլինի պարարտանյութի բացակայությունը: Պարարտանյութը պետք է սուբսիդավորվի: Հայաստանի պարարտանյութի պահանջը 300 հազար տոննայից ավելի է, իսկ այս տարի օգտագործել է ընդամենը 25 հազար տոննա պարարտանյութ:

Այն հարցին, թե արդյոք վտանգավո՞ր են սնկային հիվանդությամբ մրգերը, Հ, Բերբերյանը պատասխանեց, որ վտանգավոր չեն. «Լավ լվացեք, կերեք»: