Այսօր՝ լրագրողների հետ հանդիպման ժամանակ, Հայաստանի ագրարագյուղացիական միավորման նախագահ Հրաչյա Բերբերյանը նշեց, որ իրենց կառույցը ծանոթացել է մրցակից քաղաքական բոլոր ուժերի ծրագրերին: Սակայն նա ցավում է, որ ոչ մի քաղաքական ուժ, բացի ՀՀԿ-ից, չի ներկայացրել իր կառավարության կազմը, ինչը ժողովրդին հնարավորություն կտար այդ կազմին գնահատական տա:

Կառավարության կազմը իմանալու դեպքում պարզ կլիներ, թե արդյոք այդ քաղաքական ուժը «երկիրը կբարձրացնի, թե օդի մեջ խոսում է»: Հ. Բերբերյանի կարծիքով՝ բոլոր քաղաքական ուժերի պոտենցիալ գյուղնախարարները պետք է հավաքվեին բանավեճի, որի արդյունքում ժողովուրդը կորոշեր, թե ում ծրագիրն է առավել արդյունավետ:

Այն հարցին, թե որ քաղաքական ուժի գյուղոլորտի վերաբերյալ ծրագիրն է ամենաիրատեսականը՝ Հ. Բերբերյանը պատասխանեց՝ ՀՀԿ-ինը: Նրա կարծիքով՝ դա այն ուժն է, որը կկարողանա իրականացնել գյուղոլորտում անհրաժեշտ բարեփոխումները: Միաժամանակ նա հավաստիացրեց, որ ոչ մի քաղաքական ուժի անդամ չէ և չի էլ պատրաստվում դառնալ:

Իսկ այն հարցին, թե արդյոք ինքը կուզենար, որ հաջորդ տարիներին գյուղնախարարությունը կրկին ղեկավարեր ՕԵԿ-ական նախարարը, Հ. Բերբերյանը պատասխանեց, որ իր կարծիքով՝ «նա գյուղերում այդքան ձայն չի հավաքի»: