«Երբեւիցե չեմ նկատել «Ժառանգության» գործունեության մեջ, որ նրանք կարևորեն նեղանձնական, նեղկուսակցական շահերը»,- այսօր լրագրողների հետ հանդիպման ժամանակ հայտարարեց Արման Մուշեղյանը, ով լինելով անկուսակցական, «Ժառանգության» համամասնական ցուցակի 10-րդ համարն է:

Նրա խոսքով, երբ կուսակցության առաջնորդ Րաֆֆի Հովհաննիսյանն իրեն առաջարկել է համալրել նրանց շարքերը, իր առջև ոչ մի նախապայման չի դրվել: Ր. Հովհաննիսյանը Ա. Մուշեղյանին ասել է, որ նա հնարավորություն կունենա շարունակել զբաղվել իր նախկին գործունեությամբ` ԱԺ-ում էլ բարձրացնելով հաշմանդամություն ունեցող մարդկանց խնդիրները:

Ա. Մուշեղյանի խոսքերով` անցած 5 տարիների ընթացքում «Ժառանգությունը» եղել է այն կուսակցությունը, որը բաձրացրել է տարբեր սոցիալական խնդիրներ` այդ թվում և հաշնդամների: Հաշմանդամության խնդիրների փաթեթն այժմ ներառված է «Ժառանգության» նախընտրական ծրագրում:

Ա. Մուշեղյանը համոզված է, որ «Ժառանգությունը» ստեղծվել է ժողովրդի համար, նրան ծառայելու համար, նրա միակ կոալիցիոն գործընկերը միշտ եղել է ժողովուրդը: «Ժառանգության» համամասնական ցուցակի 6-րդ համարը, ով նույնպես ներկայացնում է հասարակական սպեկտորը` Թևան Պողոսյանը, նշեց, որ «Ժառանգությունը» երբեք իր առջև նպատակ չի դրել մարդկանց կուսակցականացնել, և եթե կան մարդիկ, ովքեր ունեն անցած ճանապարհ, ունեն կոնկրետ ծրագրեր, կարող են ընդգրկվել «Ժառանգության» շարքերը` առանց կուսակցականացվելու:

Թ. Պողոսյանի խոսքով` քարոզարշավի ընթացքում ինքը հնարավորություն է ունեցել արտահայտվելու, հայտնելու իր դիրքորոշումները, սակայն եղել են խախտումներ թե մրցակից ուժերի, թե պետական կառույցների կողմից:

Ա. Մուշեղյանը նշեց, որ պատգամավոր դառնալու դեպքում առաջին հերթին զբաղվելու է հաշմանդամության նոր օրենքի մշակմամբ: Այդ օրենքը ներկայացվել էր ԱԺ և կառավարություն, սակայն Ա. Մուշեղյանի խոսքերով` բարեբախտաբար դեռ չի ընդունվել: Օրենքի քննարկման ժամանակ նա մի հարց է բարձրացրել` արդյոք այդ օրենքը ստեղծված է հաշմանդամներին պաշտպանելու, թե նրանցից պաշտպանվելու համար:

Ա. Մուշեղյանի խոսքով` հաշմանդամություն ունեցող մարդկանց հաճախ նայում են որպես սոցիալական բեռ, մարդիկ, որոնք միշտ խնդրում են կամ կարիքավոր են: Պետք է անել ամեն ինչ, որպեսզի նրանք լիարժեքորեն ընդգրկված լինեն սոցիալ-հասարակական գործընթացներում: Ա. Մուշեղյանը նշեց, որ ԱԺ-ում ինքը աշխատելու է մասնավորապես հաշմանդամների խնդիրները լուծելու համար, առավել ևս, որ ոչ մեկ երաշխավորված չէ հաշմանդամ լինելուց: 

Ա. Մուշեղյանը նշեց, որ «Ժառանգությունն» այս տարիների ընթացքում հավատարիմ է մնացել իր գործելաոճին` ԱԺ-ում ներկայացնելով և պաշտպանելով մարդկանց իրավունքները: Այժմ, երբ կուսակցությունը վարկաբեկելու համար այլ բան չեն գտնում, փորձում են «կարմիր ու սև խաղալ` սև փնտրելով»: Այնինչ, Ր. Հովհաննիսյանը գալիս է հանուն ինչ-որ բանի, ոչ թե ընդդեմ:

Թևան Պողսյանը նշեց, որ իրենք հնարավորություն են ունեցել այցելել բոլոր մարզեր, հանդիպել իրենց համակիրներին, և այսօր «Ժառանգությունը» մեծ հնարավորություններ ունի հայտնվելու խորհրդարանում: Նա համոզված է, որ կուսակցությունն այս անգամ ավելի մեծ թվով ներկայացված կլինի, սակայն ստույգ թվեր նշելուց խուսափեց: Միաժամանակ Թ. Պողոսյանը կարծում է, որ որքան շատ ընդդիմադիր պատգամավորներ լինեն ԱԺ-ում, այնքան ավելի լավ, այդ պատճառով էլ հաջողություն է մաղթում բոլորին:

Ա. Մուշեղյանը կոչ է անում չքվեարկել միայն այս ընթացքում խոսածի համար, որովհետև «մարդակերները քարոզում են մսի վնասակարության մասին»: Պետք է քննել, թե արդյոք տվյալ ուժը հետևում է այն ժողովրդավարությանը, որը քարոզում է, կամ պաշտպանում է իր կուսակցական թույլ անդամներին, երբ խոսում է թույլերի պաշտպանության մասին: