![](/static/articles/13/90/08/l-hGXG6khtSo.jpg)
Ալիևն ու Միշելը քննարկել են հայ-ադրբեջանական սահմանի սահմանազատման ու սահմանագծման հարցերը
Ադրբեջանի նախագահ Իլհամ Ալիևը ու Եվրոպական խորհրդի նախագահ Շառլ Միշելը երեքշաբթի օրը՝ դեկտեմբերի 14-ին Բրյուսելում քննարկել են Երևանի և Բաքվի հարաբերությունների կարգավորման հարցերը։ Այդ մասին հաղորդագրություն է տարածել Ադրբեջանի նախագահի մամուլի ծառայությունը։
«Հանդիպման ընթացքում ընդգծվել է Եվրամիության աջակցությունը Ադրբեջանի և Հայաստանի հարաբերությունների կարգավորմանը:<...> Հանդիպման ընթացքում քննարկվել են հայ-ադրբեջանական սահմանի սահմանազատման ու սահմանագծման հարցերը, մտքեր փոխանակվել հաղորդակցությունների բացման և հումանիտար բնույթի հարցերի շուրջ»,- նշվում է հաղորդագրության մեջ։
Արևելյան գործընկերության գագաթնաժողովի շրջանակներում Բրյուսել են ժամանել Նիկոլ Փաշինյանն ու Իլհամ Ալիևը։ Շառլ Միշելի հետ երկկողմ հանդիպումներին կհաջորդի եռակողմ հանդիպումը, որի ընթացքում կշարունակվի քննարկումը հայ-ադրբեջանական հարաբերությունների կարգավորման շուրջ։ Արևելյան գործընկերության գագաթնաժողովը նախատեսված է դեկտեմբերի 15-ին։
Հիշեցնենք, որ Բրյուսելում հանդիպման մասին պայմանավորվածությունը ձեռք էր բերվել նոյեմբերի 19-ին, երբ Եվրոպական խորհրդի նախագահը հեռախոսազրույցներ էր ունեցել Փաշինյանի և Ալիևի հետ։
«Եվրոպական խորհրդի ղեկավար Շառլ Միշելն առաջարկել է Բրյուսելում, ԵՄ Արևելյան գործընկերության գագաթնաժողովի շրջանակներում Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հանդիպում կազմակերպել։ Առաջնորդները համաձայնել են Բրյուսելում անցկացնել հանդիպում՝ տարածաշրջանային իրավիճակի և լարվածության հաղթահարման ճանապարհների քննարկման համար»,- նշվում էր հաղորդագրության մեջ։
Կողմերը պայմանավորվել էին նաև ուղիղ կապ հաստատել պաշտպանության նախարարների մակարդակով՝ միջադեպերից խուսափելու համար։
Լուսանկարը՝ APA գործակալության
Մեկնաբանել