Չեխիայում խորհրդարանական ընտրություններից գրեթե երկու ամիս անց Հանրապետության նախագահ Միլոշ Զեմանը հաստատել է նոր, աջ կենտրոնամետ կառավարությունը։ Այդ մասին գրում է Deutsche Welle-ն։

«Սահմանադրության համաձայն՝ նախագահն այսօր նշանակել է նոր կառավարության անդամներին»,- հայտարարել է Զեմանի աշխատակազմի ղեկավար Վրատիսլավ Մինարժը։ 

Ձևավորված լիբերալ-պահպանողական կոալիցիոն կառավարությունը, որը ձևավորվել է հինգ կուսակցություններից, Պատգամավորների պալատում ստացել է մանդատների մեծամասնությունը՝ 200-ից 108 մանդատ։ Կառավարությունը գլխավորել է քաղաքագիտության 57-ամյա պրոֆեսոր Պետր Ֆիալան, որը վարչապետի պաշտոնում փոխարինել է պոպուլիստ և միլիարդատեր Անդրեյ Բաբիշին։ Վերջինս վերջերս հրապարակված «Պանդորայի փաստաթղթեր»-ի հիմնական կերպարներից մեկն է։ 

Նորանշանակ վարչապետի և Չեխիայի նախագահի ամենամեծ անհամաձայնությունը արտաքին գործերի նախարարի նշանակումն էր։ Զեմանը դեմ էր այդ պաշտոնում Ծովահենների կուսակցությունից Յան Լիպավսկու նշանակմանը, որը քննադատական դիրքորոշում ունի Ռուսաստանի և Չինաստանի նկատմամբ, ինչպես նաև վատատես է Վիշեգրադի խմբի հարցում, որին բացի Չեխիայից, անդամակցում են նաև Հունգարիան, Սլովակիան և Լեհաստանը։ Այդուհանդերձ, նախագահ Զեմանը Լիպավսկուն նշանակել է Չեխիայի ԱԳ նախարարի պաշտոնում։ 

Նոր կառավարության 18 անդամներից երեքը կանայք են։ 2010 թվականից ի վեր առաջին անգամ կառավարության կազմում հայտնվել է Եվրոպայի հարցերով նախարարի պաշտոն։ Այն զբաղեցրել է Բրնոյի համալսարանի նախկին ռեկտոր Միկուլաշ Բեկը։ 2022 թվականի երկրորդ կեսին Չեխիային կփոխանցվի ԵՄ նախագահությունը։

Լուսանկարը՝ Associated Press գործակալության