Շրջակա միջավայրի նախարարությունն առաջարկում է աղբավայրերի մոնիթորինգ իրականացնել։ Այս նախաձեռնությունն այսօր հանրային քննարկման է ներկայացվել իրավական ակտերի նախագծերի հրապարակման միասնական կայքում։

«Աղբավայրերի մոնիթորինգի իրականացման կարգը սահմանելու մասին» Կառավարության որոշման նախագծի ընդունումը, ըստ շրջակա միջավայրի նախարարության, կնպաստի աղբավայրերի շահագործման ընթացքում մարդկանց առողջության և շրջակա միջավայրի վրա դրանց վնասակար ազդեցության կանխարգելմանը կամ նվազեցմանը, կապահովի աղբավայրի տարածքում մթնոլորտային օդի, հողի, ջրի աղտոտվածության վերաբերյալ անհրաժեշտ տվյալների հավաքագրումը։ 

Ինչպես նշված է նախագծի հիմնավորման մեջ, մոնիթորինգի արդյունքում ստացված տվյալները հնարավորություն կտան գնահատելու աղբավայրը շահագործողի կողմից իրականացրած բնապահպանական միջոցառումների արդյունավետությունը և ըստ անհրաժեշտության կայացնել խնդրի կարգավորմանն ուղղված որոշումներ։

Աղբավայրի տարածքում իրականացված մոնիթորինգի խնդիրն է լինելու հետևյալ հանգամանքները պարզելը․

• թաղման նպատակով ընդունված թափոնների համապատասխանությունը տվյալ դասի աղբավայրի համար սահմանված պահանջներին,
• աղբավայրի տարածքում իրականացվող գործողությունների համապատասխանությունը օրենսդրությամբ սահմանված ընթացակարգերին,
• շրջակա միջավայրի աղտոտումը կանխող համակարգերի օգտագործման  արդյունավետությունը,
• նախատեսվող աղբավայրի նախագծային փաստաթղթերում նշված պայմանների և շահագործումը թույլատրող  փաստաթղթերով սահմանված պահանջների  կատարումը:

Շրջակա միջավայրի նախարարությունն ընդգծում է, որ «Աղբավայրերի մոնիթորինգի իրականացման կարգը սահմանելու մասին» Կառավարության որոշման նախագծի ընդունման դեպքում պետական կամ տեղական ինքնակառավարման մարմնի բյուջեում եկամուտների և ծախսերի ավելացում կամ նվազեցում չի նախատեսվում:

Որոշման նախագծի մշակումը բխում է Կառավարության 2021-2026թթ. ծրագրի շրջակա միջավայրի կառավարման ուղղություններից։

Հավելենք՝ որոշման նախագիծն օրինական ուժ կստանա միայն կառավարության հավանությանն արժանանալու դեպքում։