Մարդու իրավունքների պաշտպանի պաշտոնում առաջադրված Քրիստինե Գրիգորյանի վերաբերյալ հարցի քննարկմանը «Հայաստան» խմբակցության պատգամավոր Արեգնազ Մանուկյանն անդրադարձավ պաշտպանության նախարար Սուրեն Պապիկյանի հարսանյաց արարողությանը: Նա միացրեց ձայնագրություն, որտեղ Պապիկյանը, անդրադառնալով կորոնավիրուսային համավարակին, նշել էր, որ շարունակում է խնդիր մնալ հավաքույթներն և մասնավորապես՝ հարսանյաց հանդեսները:

«Յուրաքանչյուրիս գործողությամբ կարող են փրկվել կյանքեր, և անգործությամբ կարող են արձանագրվել մահեր: Մեզ պետք է հանրային բարձր գիտակցություն»,- ձայնագրության մեջ ասում էր Պապիկյանը:

Պատգամավորի խոսքով` դեռ երեք տարի առաջ Պապիկյանը կերազեր նման օլիգարխիկ հաճույքներին համարժեք հարսանյաց հանդես անել:

Այս խոսքերից հետո քաղաքական մեծամասնության պատգամավորներից տեղից արձագանքում էին, սակայն նախագահող Ալեն Սիմոնյանը սաստեց գործընկերներին և զգուշացրեց` դահլիճից կհեռացնի, եթե տեղից խոսեն:

«Իմ հիշատակած անձնավորությունը, իր քաղաքական թիմի անդամներն ու իրենց հրահանգավորող ղեկավարը շաբաթ օրը մասնացել են հարսանիքի, հարսանիք, որն իր ճոխությամբ չէր զիջում նախկին իշխանությունների ժամանակ պաշտոնյաների կողմից կազմակերպվող նմանօրինակ միջոցառումներին: Հարսանիք, որն արվում էր նույն ժամանակ, երբ Ադրբեջանը մտել է ինքնիշխան տարածք ու ամիսներով դուրս չի գալիս»,-ասաց Մանուկյանը:

Պատգամավորը տարակուսանք հայտնեց, թե հարսանյաց հանդեսի ներկաներից քանիսից են պահանջել պատվաստումը հավաստող տեղեկանք, ինչպես նաև հավելեց` կոռուպցիոն ռիսկի առերևույթ կասկածներ են առաջանում:

«Եւ որի վերաբերյալ ծպտուն չի անի ՔՊ-ի ներկայացրած ՄԻՊ թեկնածուն, ինչպես որ խուսափողական պատասխան տվեց «Վիվառո»-ի սեփականատիրոջ հետ ահա այստեղ նստած Ալեն Սիմոնյանի և մյուս պատգամավորների միկոնոսյան զվարճանքների և Ալեն Սիմոնյանի եղբոր ընկերության ասֆալտապատման տենդերներ շահելու մասին իմ հնչեցրած հարցին: Չի հանի, որովհետև նրան հենց դրա համար են նստեցնում այդ պաշտոնին»,- ասաց Արեգնազ Մանուկյանը:

Ընդդիմադիր պատգամավորը հիշեցրեց` օրենսդրության համաձայն ՄԻՊ-ի պաշտոնում կարող է առաջադրվել հանրության շրջանում բարձր հեղինակություն ունեցող անձ: Նա ընդգծեց` ակնհայտ է, որ Քրիստինե Գրիգորյանը չի բավարարում այս պահանջին, նա ոչ միայն բարձր հեղինակություն չունի, այլ նաև լայն հանրության շրջանակներին անհայտ է:

«Բացի այդ` մեզ հայտնի չեն հանրային հնչեղություն ունեցող երևույթների վերաբերյալ թեկնածուի տեսակետները, նա եղել է այս իշխանության թիմում ու ծպտուն չի հանել իրավականի անվան տակ քաղաքական հետապնդումների, դատարանները շրջափակելու, Հայաստանի տարածքները բանավոր փոխըմբռմամբ թշնամուն հանձնելու վերաբերյալ»,- ասաց Մանուկյանը: