Երևան քաղաքի ընդհանուր իրավասության դատարանը՝ նախագահությամբ դատավոր Մանվել Շահվերդյանի, քիչ առաջ որոշեց անփոփոխ թողնել Պաշտպանության նախկին նախարար Դավիթ Տոնոյանի, ՊՆ-ին զենք մատակարարած ընկերության տնօրեն Դավիթ Գալստյանի, ՊՆ ԳՇ պետի նախկին տեղակալ Ստեփան Գալստյանի, Ռազմական Ավիացիայի նախկին պետ Ավետիք Մուրադյանի խափանման միջոց կալանավորումը: Դատարանը մեղադրյալներից մեկին` Արտյոմ Համբարյանին, 5 մլն դրամ գրավի դիմաց ազատ արձակելու միջնորդությունը բավարարեց:

Նիստը դռնփակ էր, լրագրողներին այս մասին ասաց Դավիթ Տոնոյանի պաշտպաններից Սերգեյ Հովհաննիսյանը:

Այսպիսով այս պահին ՊՆ-ից ենթադրյալ հափշտակություն կատարելու դեպքի առթիվ քննվող քրեական գործով 7 մեղադրյալներից 4-ը կալանքի տակ են, 3-ի` ՊՆ ԳՇ պետ Արտակ Դավթյանի, ՊՆ ավիացիայի վարչության գլխավոր ինժեներ Վլադիմիր Բաբայանի և ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանի նկատմամբ ընտրված է ազատազրկման հետ չկապված խափանման միջոց: Կալանքի տակ գտնվող անձանց պաշտպանները թեև չեն առարկում երեք մեղադրյալի նկատմամբ ազատազրկման հետ չկապված խափանման միջոցի ընտրությունը` այնուամենայնիվ, համեմատականներ կատարելով` բարձրաձանում են այն մասին, որ, փաստորեն ՊՆ-ում պաշտոն զբաղեցնող անձինք ազատության մեջ են, իսկ նրանք, որոնք պաշտոն չեմ զբաղեցնում, կալանքի տակ: Սա այն պարագայում, երբ մեղադրյալների նկատմամբ կալանավորումը` որպես խափանման միջոց ընտրելու հիմնավորումների մեջ մեղադրանքի կողմը նշել է, որ առկա է մեղադրյալների կողմից գործի քննությունը խոչընդոտելու ռիսկ` հաշվի առնելով այն հանգամանքը, որ նրանք պաշտոն են զբաղեցրել ՊՆ-ում:

Հիշեցնենք, որ դատարանը հունվարի 21-ին էր ավարտել մեղադրյալների խափանման միջոցի հարց քննությունն ու հեռացել խորհրդակցական սենյակ՝ որոշում կայացնելու: Դավիթ Գալստյանի, Ավետիք Մուրադյանի, Արտյոմ Համբարյանի պաշտպանները դատարանին ներկայացրել են իրենց պաշտպանյալներին գրավի դիմաց ազատ արձակելու միջնորդություն, իսկ Տոնոյանի պաշտպան Սերգեյ Հովհաննիսյանն էլ ներկայացրել է նախկին նախարարին անձնական երաշխավորությամբ ազատ արձակելու միջնորդություն: Տոնոյանի պատշաճ վարքագիծն ազատության մեջ երաշխավորել են ԱԺ «Քաղաքացիական պայմանագիր» խմբակցության պատգամավորներ Վիլեն Գաբրիելյանը, Քրիստինե Պողոսյանը և «Հանրապետություն» կուսակցության ղեկավար Արամ Զավենի Սարգսյանը:

ԱԱԾ-ի տարածած հաղորդագրության համաձայն` քրեական գործը վերաբերում է Զինված ուժերի կարիքների համար ռազմամթերքի մատակարարման գործընթացում ենթադրյալ չարաշահումներ և առանձնապես խոշոր չափերով հափշտակություններ կատարելու դեպքերին, մասնավորապես` ՊՆ-ի կողմից անպիտան հրթիռներ գնելուն:

Դատախազությունից էլ մանրամասնել են, որ քրեական գործով պարզվել է, որ ԶՈւ և ՊՆ- ի բարձրաստիճան պաշտոնատար անձինք, չարաշահելով իրենց պաշտոնեական դիրքը, «Մոսթոն Ինժիներինգ» ընկերության սեփականատիրոջ հետ նախնական համաձայնությամբ, «Նեյտրոն ԳԱՄ» և «Բագավան» ՓԲ ընկերությունների մասնավորեցումից ընկերության կողմից Պաշտպանության նախարարության հանդեպ ունեցած պարտավորությունը մարելու նպատակով, 2018թ. ընկերությունից ընդունել՝ ձեռք են բերել 4232 հատ ժամկետանց, տեխնիկական պահանջներին չհամապատասխանելու պատճառաբանությամբ նախկինում չընդունված և ՊՆ-ում պահեստավորված ռազմամթերքը։

Պարզվել է նաև, որ վերը նշված անձինք ռազմամթերքի ձեռքբերման պայմանագրի կնքման համար առկա խոչընդոտները վերացնելու և իրենց գործողություններին օրինական տեսք տալու համար պայմանագրի մաս կազմող տեխնիկական բնութագիրը համապատասխանեցրել են փաստացի ՊՆ-ում ի պահ հանձնված ապրանքի տվյալ տեսակին՝ դրանում նշելով ռազմամթերքը գործարանային արկղերով ՊՆ N զորամասի կենտրոնական պահեստ մատակարարելու վերաբերյալ իրականությանը չհամապատասխանող տվյալներ։

Ընդ որում՝ նշված ռազմաթերքը ձեռք է բերվել նույն խմբաքանակից ռազմամթերքի նախկինում ձեռքբերման արժեքից գրեթե կրկնակի թանկ գնով՝ կատարելով առանձնապես խոշոր չափերով՝ 2,277,323,840 ՀՀ դրամին համարժեք, 4.655.200 ԱՄՆ դոլար գումարի հափշտակություն։ Ըստ մեղադրանքի` Դավիթ Տոնոյանի՝ Քրեական օրենսգրքի 179-րդ հոդվածի 3-րդ մասի 1-ին կետով, Արտակ Դավթյանի՝ ՀՀ քրեական օրենսգրքի 375-րդ հոդվածի 3-րդ մասով, Ստեփան Գալստյանի՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Ավետիկ Մուրադյանի՝ Քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Վլադիմիր Բաբայանի՝ Քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Արտյոմ Համբարյանի՝ Քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Դավիթ Գալստյանի՝ Քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով: Մեղադրյալներն իրենց առաջադրված մեղադրանքը չեն ընդունում:

Լուսանկարում` Դավիթ Տոնոյանի պաշտպան Սերգեյ Հովհաննիսյանը