
Արմեն Սարգսյանի մտահոգությունները վերաբերում են պետության առջև ծառացած խնդիրներին․ հայտարարություն
Հանրապետության նախագահի աշխատակազմը հերթական հայտարարությունն է տարածել Արմեն Սարգսյանի հրաժարականի մասին քննարկումների վերաբերյալ, որում ասվում է հետևյալը․
«Վերջին օրերին տարբեր անհատների, քաղաքական գործիչների, քաղաքագետների, ներկա կամ նախկին պատգամավորների, վերլուծաբանների և «կանխատեսողների» կողմից հնչում են տարբեր մտքեր, պնդումներ և համոզմունքներ, ներկայացվում են տարբեր մտացածին պատմություններ ու պատումներ:
Հանրապետության նախագահի աշխատակազմը չի պատրաստվում մեկնաբանել դավադրության տեսությունների և քաղաքական առասպելաբանության այդ դրսևորումները:
Նախագահ Արմեն Սարգսյանի մտահոգությունները վերաբերել և վերաբերում են պետության առջև ծառացած իրական խնդիրներին ու մարտահրավերներին, որոնց դիմակայելն ու լուծման ճանապարհներ գտնելն այսօրվա և բոլորի գերխնդիրն է»:
Հիշեցնենք, որ Արմեն Սարգսյանը հրաժարականի մասին հայտարարեց 2022թ․ հունվարի 23-ին։ «Հետքը» պարզել էր, որ մինչև նախագահ դառնալը Արմեն Սարգսյանը ՀՀ քաղաքացի լինելուց բացի նաև Սենթ Քիթս և Նևիսի քաղաքացի է եղել։
Մեկնաբանել