Անկարայում մեկնարկել է Թուրքիայի ազգային անվտանգության խորհրդի նիստը։ Այն մեկնարկել է տեղի ժամանակով 15:20-ին (Երևանի ժամանակով 16:20-ին) Նախագահական համալիրում և ընթանում է փակ ռեժիմով՝ այդ երկրի նախագահ Ռեջեփ Թայիփ Էրդողանի գլխավորությամբ։

Թուրքիայի ազգային անվտանգության խորհրդի այս տարվա առաջին նիստի մասնակիցները քննարկում են ներքին և միջազգային օրակարգի մի շարք հարցեր, այդ թվում հայ-թուրքական հարաբերությունները։ 

Թուրքական լրատվամիջոցների տվյալներով՝ նախատեսվում է, որ Մևլյութ Չավուշօղլուն խորհրդի անդամներին կզեկուցի Հայաստանի հետ բանակցությունների ընթացքի մասին։ 

Նիստի ընթացքում կքննարկվեն նաև ռուս-ուկրաինական ճգնաժամը, Արևելյան Միջերկրականի զարգացումները, Լիբիայում առկա իրավիճակը և  Իսրայելի հետ հարաբերությունները:

Լուսանկարը՝ արխիվային/Թուրքիայի նախագահի աշխատակազմի մամուլի ծառայություն