Վերաքննիչ դատարանը, Նարինե Բարսեղյանի նախագահությամբ, փետրվարի 10-ին մերժել է Շրջակա միջավայրի նախկին նախարար, այժմ Պետական վերահսկողական ծառայության ղեկավարի պաշտոնը զբաղեցնող Ռոմանոս Պետրոսյանի բողոքը։ Վերջինս բողոքարկել էր առաջին ատյանի դատարանի վճիռը, որով ՇՄՆ «Արգելոցապարկային համալիր» ՊՈԱԿ-ի՝ աշխատանքից հեռացված տնօրեն Լևոն Գաբրիելյանը վերականգնվելու էր պաշտոնում, ստանալու էր միջին աշխատավարձը ողջ պարապուրդի ժամանակահատվածի համար։

Հիշեցնենք՝ դատավոր Գրիգորի Վարդանյանի սեպտեմբերի 3-ին կայացրած վճռով՝ ամբողջությամբ բավարարվել էին ՊՈԱԿ-ի տնօրենի պահանջները. անվավեր էին ճանաչվել նախարար Ռոմանոս Պետրոսյանի հրամանները, այդ թվում՝ Լևոն Գաբրիելյանի պաշտոնից ազատման հրամանը, նրան վերականգնել էր պաշտոնում և պարտավորեցրել Շրջակա միջավայրի նախարարությանը Գաբրիելյանին վճարել նրա միջին աշխատավարձը ողջ պարապուրդի համար: Բացի դրանից, ՇՄՆ-ն պետք է փոխհատուցեր Լևոն Գաբրիելյանի փաստաբանական ծախսերը՝ 120 hազար դրամի չափով և պետտուրքը՝ 8000 դրամ:

Նախ՝ Լևոն Գաբրիելյանը շրջակա միջավայրի նախարարի 2020թ. օգոստոսի 28-ի հրամանի հիման վրա ենթարկվել էր կարգապահական տույժի՝ խիստ նկատողություն՝ աշխատանքային պարտականություններն իր մեղքով չկատարելու համար, սակայն հրամանով չէր հիմնավորվել, թե կոնկրետ որ պարտականությունները չեր կատարել:

2020թ. նոյեմբերի 27-ին Ռոմանոս Պետրոսյանը կայացրել էր մեկ այլ հրաման, որով Գաբրիելյանի նկատմամբ կիրառվել էր ևս մեկ կարգապահական տույժ՝ խիստ նկատողություն աշխատանքային պարտականությունները ոչ պատշաճ կատարելու համար։ Մասնավորապես՝ 2019թ. հոկտեմբերի 18-ին «Արգելոցապարկային համալիր» ՊՈԱԿ-ի և «Բեքստեյջ» ՍՊ ընկերության միջև կնքված հողամասի վարձակալության մասին պայմանագրով հողամասի օգտագործման պայմանների նկատմամբ իբրև պատշաճ հսկողություն չէր իրականացրել:

2020թ. նոյեմբերի 30-ին նախարարի երրորդ հրամանով՝ մեկ տարվա ընթացքում օրենքի խախտման համար կրկնակի կարգապահական պատասխանատվության ենթարկվելու հիմքով Գաբրիելյանի լիազորությունները 2020թ. դեկտեմբերի 1-ից դադարեցվել էին, և լուծվել էր վերջինիս հետ 2018թ. մարտի 7-ի կնքված աշխատանքային պայմանագիրը:

Վերաքննիչ դատարանն ընդհանուր իրավասության դատարանի հետևությունները համարել է  հիմնավոր և գտել, որ գործում առկա ապացույցների և փաստերի համադրմամբ դեռևս չի հիմնավորվում աշխատողի` «Արգելոցապարկային համալիր» ՊՈԱԿ-ի տնօրեն Լևոն Գաբրիելյանի մեղքով աշխատանքային պարտականությունները չկատարելու կամ ոչ պատշաճ կատարելու հետևանքով աշխատանքային կարգապահության խախտումներ թույլ տալու և այդ հիմքերով երկու անգամ կարգապահական պատասխանատվության ենթարկվելու փաստերը։ Հետևաբար հիմնավոր է համարել դատարանի այն հետևությունը, որ անվավեր ճանաչման է ենթակա նաև  աշխատանքային պայմանագիրը լուծելու մասին հրամանը ևս:

Նշվածը հիմք ընդունելով` Վերաքննիչ դատարանը գտել է, որ վերաքննիչ բողոքի փաստարկներն անհիմն են, ընդհանուր իրավասության դատարանի կողմից կայացված դատական ակտն օրինական է և հիմնավոր, ուստի պետք է թողնել անփոփոխ:

Կարդացեք նաև՝

• Ռոմանոս Պետրոսյանի հրամաններն անվավեր են ճանաչվել. «Արգելոցապարկային համալիր» ՊՈԱԿ-ի տնօրենը կվերականգնվի պաշտոնում

• «Արգելոցապարկային համալիր» ՊՈԱԿ-ի տնօրենն ընդդեմ շրջակա միջավայրի նախարար Ռոմանոս Պետրոսյանի

• Երբ իրավունքը ստորադասվում է քաղաքական հայացքներին