Հանրապետության նախագահի լիազորությունները կատարող Ալեն Սիմոնյանի հրամանագրով՝ Արտակ Դավթյանն ազատվել է ՀՀ զինված ուժերի գլխավոր շտաբի պետի պաշտոնից։

«Հիմք ընդունելով վարչապետի առաջարկությունը՝ համաձայն Սահմանադրության 133-րդ հոդվածի 1-ին մասի, ինչպես նաև «Զինվորական ծառայության և զինծառայողի կարգավիճակի մասին» օրենքի 40-րդ հոդվածի 3-րդ մասի, Արտակ Դավթյանին ազատել Հայաստանի Հանրապետության զինված ուժերի գլխավոր շտաբի պետի պաշտոնից»,- ասվում է Ալեն Սիմոնյանի հրամանագրում:

Հիշեցնենք՝ 2018 թվականի իշխանափոխությունից հետո՝ նույն տարվա մայիսի 24-ին, Արտակ Դավթյանը նշանակվեց զինված ուժերի գլխավոր շտաբի պետ։ 2020թ․ հունիսի 8-ին նա ազատվել է այդ պաշտոնից։ 2020-ի հուլիսի 17-ին Արտակ Դավթյանը նշանակվել է ռազմարդյունաբերական կոմիտեի նախագահ։ 2020-ի նոյեմբերի 11-ին Արտակ Դավթյանն այդ պաշտոնից էլ է ազատվել։

2021թ․ մարտի 22-ին Արտակ Դավթյանը կրկին նշանակվել էր զինված ուժերի գլխավոր շտաբի պետ՝ այդ պաշտոնում փոխարինելով Օնիկ Գասպարյանին։