Երկու տարվա դադարից հետո այսօր Արմավիրի մարզպետարանում հրավիրվել էր մարզխորհրդի նիստ: Սա իր բնույթով առաջին նիստն էր՝ համայնքների խոշորացումից հետո: Մարզում վերջին անգամ մարզխորհրդի նիստ հրավիրվել էր 2020թ. հունվարի 30-ին: Նիստեր չհրավիրելը մարզպետարանը պատճառաբանում էր կորոնավիրուսային հիվանդության համավարակով: Սակայն, զարմանալիորեն չէին խուսափում զանգվածային այլ միջոցառումներից:

Մարզպետ Էդվարդ Հովհաննիսյանը ներկայացրեց Արմավիրի մարզպետի աշխատակազմի 2021թ. գործունեության հաշվետվությունը: Այս հաշվետվությունը, կարելի է ասել, վերաբերում էր նախկին մարզպետին՝ Համբարձում Մաթևոսյանին, որը այժմ զբաղեցնում է փոխվարչապետի պաշտոնը:

Էդվարդ Հովհաննիսյանը Արմավիրի մարզպետի պաշտոնում նշանակվել է 2021թ. նոյեմբերի 26-ին:

Մարզպետը նշեց, որ 2020թ․ ճգնաժամերը՝ կորոնավիրուսային համավարակը, դրա հետևանքով տնտեսական ճգնաժամը և Ադրբեջանի սանձազերծած 44-օրյա պատերազմի հետևանքները, ծանր հարված են հասցրել մարզի տնտեսությանը՝ ընդհատելով տնտեսական աճի տեմպը։ Չնայած առկա մարտահրավերներին՝ 2021 թվականը տնտեսական առումով հուսադրող է եղել։

Արմավիրի մարզում համախառն արդյունաբերական արտադրանքի ծավալը (ընթացիկ գներով) 2021թ. կազմել է 117.2 մլրդ դրամ, որը կազմել է հանրապետության ցուցանիշի 4.9 %-ը: Համեմատության համար նշենք, որ 2020թ. ծավալը կազմել է 119.5 մլրդ դրամ և դրա հետ համեմատ ցուցանիշը նվազել է 2.3 մլրդ դրամով կամ 1.9%-ով:

Մարզի տնտեսությունում գերակշռողը գյուղատնտեսության ոլորտն է: Գյուղատնտեսական համախառն արտադրանքը 2021թ. կազմել է 211 մլրդ դրամ, որը կազմել է հանրապետության ցուցանիշի 22.6%-ը: Այս ցուցանիշով Արմավիրը մարզերի ցանկում առաջատարն է: 2020թ. կազմել է 173.9 մլրդ դրամ և այդ ցուցանիշի հետ համեմատ աճել է 37.1 մլրդ. դրամով կամ 21.3%-ով:

2021թ. ընթացքում հավանության է արժանացել 38 համայնքի կողմից ներկայացված 60 սուբվենցիոն ծրագիր՝ 2 մլրդ 86 մլն դրամ ընդհանուր արժեքով, որից պետական բյուջեի համաֆինանսավորումը կազմել է 1 մլրդ 114 մլն դրամ:

Այնուհետև համապատասխան ոլորտի մասնագետները ներկայացրին ապօրինի շինությունների օրինականացման, իրավական և մասնագիտական հսկողության արդյունքները: