Սյունիքի մարզի ընդհանուր իրավասության դատարանի դատավոր Բորիս Բախշիյանը կշարունակի մնալ կալանավորված: Վերաքննիչ քրեական դատարանը՝ նախագահությամբ դատավոր Տիգրան Սիմոնյանի, մերժեց նրա պաշտպանների կողմից ներկայացված վերաքննիչ բողոքները:

Հիշեցնենք, որ Բորիս Բախշիյանը կալանավորվել է Երևանի ընդհանուր իրավասության դատարանի դատավոր Դավիթ Արղամանյանի որոշմամբ: Մեղադրվում է անձին ակնհայտ ապօրինի կալանավորելու մեջ, որն առաջացրել է ծանր հետևանք: Դատավոր Բորիս Բախշիյանի որոշմամբ՝ կալանավորվել է իր վարույթում գտնվող գործով ամբաստանալներից մեկը, որը նշանակված նիստի օրը չի  ներկայացել դատարան:

Վերջինս պաշտպանը նիստից առաջ դատարան գրություն է ուղարկել, որ անհետաձգելի քննչական գործողության պետք է մասնակցի, ներկայանալ չի կարող, իսկ պաշտպանյալը չի ցանկանում առանց իրեն ներկայանալ դատարան:  Դատախազությունը անձին կալանավորելու վերաբերյալ Բախշիյանի որոշումը չի բողոքարկել, այն մտել է օրինական ուժի մեջ, սակայն այժմ դատախազությունը պնդում է, որ որոշումը եղել է ակնհայտ ապօրինի: