Վարչապետի աշխատակազմն արձագանքել է նախօերին Երևանի Պարոնյան-Լեո փողոցների խաչմերուկում տեղի ունեցած վրաերթին։ Հիշեցնենք, որ երեկ՝ ապրիլի 26-ին, Պարոնյան-Լեո խաչմերուկում Ճանապարհային ոստիկանության՝ վարչապետին ուեղեկցող գումարտակի ավտոմեքենաներից մեկը վրաերթի էր ենթարկել 29-ամյա հղի կնոջ, ինչի հետևանքով վերջինս մահացել էր։

Տեղի ունեցած միջադեպը մամուլում և սոցցանցերում մեծ քննարկումների առիթ դարձավ, շատերը մեղադրում էին ՃՈ ուղեկցող գումարտակի ծառայողներին և անձամբ վարչապետ Փաշինյանին, թե ինչու վրաերթից հետո նրանք չեն կանգնել և փորձել օգնություն ցուցաբերել կնոջը։ Այս քննադատություններին ֆեյսբուքյան իր էջում արձագանքել է վարչապետի աշխատակազմի ղեկավարի տեղակալ Տարոն Չախոյանը, որի գրառման մեջ նշված է հետևյալը․

«Ապրիլի 26-ին Լեո-Պարոնյան խաչմերուկում տեղի ունեցած վթարի կապակցությամբ քննարկումների համատեքստում պետք է արձագանքել մի շարք հարցերի.

Հարց - Ինչու դեպքից հետո վարչապետի շարասյունը կանգ չի առել վրաերթի ենթարկված կնոջն օգնություն ցուցաբերելու համար:

Պատասխան – Բուն վրաերթի պահին վարչապետի ավտոմեքենան եղել է դեպքի վայրից մոտավորապես 100-150 մետր հեռավորության վրա: Վրաերթի պահը նրա մեքենայի միջից չի երեւացել ու չէր կարող երեւալ:  Վարչապետի ավտոմեքենան դեպքի վայրով անցել է տեղի ունեցածից ինչ-որ վայրկյաններ անց: Այսինքն՝ բուն վրաերթից 150 մետրը անցնելու համար անհրաժեշտ վայրկյանների ընթացքում վարչապետը տեղյակ չի եղել եւ չէր կարող տեղեկանալ, թե կոնկրետ ինչ է կատարվել: Վրաերթի վայրի մոտով անցնելիս նկատելով ընկած կնոջը՝ վարչապետը հրահանգել է Շտապ օգնություն կանչել եւ պարզել ինչ է տեղի ունեցել: Շտապ օգնությունը ժամանել է րոպեներ անց: Այն մասին, որ տեղի է ունեցել վրաերթ՝ ՃՈ ուղեկցող գումարտակի ավտոմեքենայի կողմից, վարչապետը իրազեկվել է Ազգային ժողով հասնելուն պես, որից հետո համապատասխան հրահանգներ է տվել առողջապահության նախարարին եւ իրավապահներին:  

Հարց – ՃՈ աշխատողները չէին կարող չնկատել վթարը: Ինչու՞ նրանք չեն կանգնել օգնություն ցուցաբերելու:

Պատասխան – ՃՈ ուղեկցող գումարտակի ավտոմեքենան կանգ առնելու դեպքում կանգ կառներ ամբողջ շարասյունը՝ փակելով փողոցի ամբողջ երթեւեկությունը եւ լրացուցիչ խցանումներ առաջացնելով նաեւ հարակից փողոցներում, այսպիսով խոչընդոտելով Շտապօգնության մեքենայի մոտենալուն, այդ թվում՝ բուն դեպքի վայրին եւ տուժողին մոտենալուն: Նաեւ նման հանգամանքների հաշվառումով՝ ըստ աշխատանքի միջազգայնորեն ընդունված կանոնակարգի՝ երկրների ղեկավարների շարասյունը ուղեկցող (տվյալ դեպքում՝ ՃՈ) մեքենաներն իրավունք չունեն չնախատեսված տեղում կանգ առնելու՝ անգամ պատահարների դեպքում: 

Հարց – Ինչու վարչապետը ցավակցություն չի հայտնել վրաերթի կապակցությամբ: 

Պատասխան – Վարչապետը հեռախոսազրույց է ունեցել վրաերթի ենթարկված Սոնա Մնացականյանի հայրիկի հետ, ցավակցություն հայտնել նրան եւ նրա ընտանիքի անդամներին, ցավ ու ափսոսանք հայտնել տեղի ունեցածի կապակցությամբ եւ երաշխավորել, որ տեղի կունենա դեպքի օբյեկտիվ քննություն»:

Հիշեցնենք՝ ապրիլի 26-ի երեկոյան Քննչական կոմիտեն հաղորդեց, որ կնոջը վրաերթի ենթարկած ուղեկցող գումարտակի վաշտի հրամանատարը ձերբակալվել է։ Դեպքի առթիվ հարուցվել է քրեական գործ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածի 1-ին մասով։

Ձերբակալված ոստիկանի պաշտպան Ռուբեն Բալոյանը «Հետքի» հետ զրույցում նշել էր, որ իր պաշտպանյալը օրենքի շրջանակներում է գործել՝ ճանապարհային երթևեկության կանոնների պահանջների շրջանակներում, բայց այդ, ըստ պաշտպանի՝ նա դեպքի վայրը չի լքել, 30-40 մետր անցնելուց հետո կանգնել է, ոտքով վերադարձել դեպքի վայր, որտեղ շատ արագ շտապօգնության մեքենա է եկել: