Կառավարությունը 750 մլն դրամ կհատկացնի Երևանի մետրոյի Աջափնյակ կայարանի նախագծման աշխատանքների համար։  Նոր կայարանի կառուցման վերաբերյալ քննարկում ծավալվեց գործադիրի ապրիլի 28-ի նիստի ավարտին։

Վարչապետի Նիկոլ Փաշինյանը նշեց, որ հայտարարված մրցույթում կա հաղթող: Նա նաև տեղեկացրեց, որ քրեական գործի շրջանակում «Փարկինգ Սիթի Սերվիս» ընկերության կողմից Երևան համայնքին հասցված շուրջ 850 մլն դրամի վնասի փոխհատուցում է եղել։

«Քննարկումների արդյունքում որոշվել է առաջին փուլով 750 մլն դրամը ուղղել այդ նպատակին»,- նշեց վարչապետը։

Երևանի քաղաքապետ Հրաչյա Սարգսյանն էլ ասաց, որ 750 մլն դրամը նախատեսված է նախագծման աշխատանքների առաջին երկու փուլերի համար։

«Կխնդրեի ձեր հանձնարարականը, որպեսզի մենք կարողանանք աշխատել նախագծման երրորդ փուլի ֆինանսավորման աղբյուրների հայթայթման ուղղությամբ, ինչպես նաև մետրոպոլիտենի կառուցման հետ կապված»,- նշեց քաղաքապետը։

Ըստ Սարգսյանի՝ այժմ մետրոպոլիտենում խնդիրներ կան, որոնք լուծման համար նույնպես ֆինանսական միջոցների ներգրավման կարիք կա։