Դատախազությունն ուսումնասիրում է այսօր ընդդիմության բողոքի ակցիայի ժամանակ Ազգային անվտանգության ծառայության ՊՊԾ գնդի պետ Սարգիս Հովհաննիսյանի կողմից Mediahub-ի օպերատորին հարվածելու տեսանյութը: Այս մասին «Հետք»-ի հարցին ի պատասխան՝ ասաց դատախազության հանրային կապերի բաժնի պետ Արևիկ Խաչատրյանը: Ուսումնասիրվում է նաև բողոքի ակցիայի ժամանակ քաղաքացիներից մեկի գլխին հարվածներ հասցնելու դեպքի վերաբերյալ տեսանյութը: 

Հիշեցնենք, որ այսօր ոստիկանները բերման ենթարկելիս են եղել բողոքի ակցիա իրականացնող քաղաքացիներին, երբ Mediahub-ի լրագրողը նկատել է Սարգիս Հովհաննիսյանին ու փորձել զրուցել նրա հետ։ Վերջինս հեռախոսով խոսելիս է եղել, կոպիտ պատասխանել է լրագրողին, ապա ոտքով հարվածել նաև Mediahub-ի օպերատորին, ինչի մասին լրատվամիջոցի լրագրողը հետևորդներին պատմել է հենց ուղիղ եթերում: Երբ լրագրողն ասում է, որ Հովհաննիսյանն իրավունք չունի օպերատորին ոտքով հարվածելու, լրագրողի տեսախցիկին հարվածելու, Հովհաննիսյանը պատասխանում է, որ իրավունք ունի:

«Ասում եմ՝ խոսում եմ, գնացեք այն կողմ»,- պատասխանում է Հովհաննիսյանը:

Քաղաքացիներից մեկը նրան հորդորում է չբղավել: Այս ընթացքում լսվում է մեկի ձայնը, հավանաբար՝ օպերատորի, որն ասում է՝ «ինձ էշերն են քացի տալիս»:

«Ասա թող խելոք պահի, բերանը…»,- ասում է Հովհաննիսյանը, որից հետո ներկաներից մի կին փորձում է պարզել, թե ինչ էր ուզում ասել գնդապետը:

«Բերանը ի՞նչ»,- ասում է քաղաքացին:

«Ուզո՞ւմ ես իմանաս՝ ինչ»,- ագրեսիվ պատասխանում է բարձրաստիճան պաշտոնյան:

Տարածված մեկ այլ տեսանյութում երևում է, թե ինչպես են ոստիկանները հարվածում քաղաքացիներից մեկի գլխին, որին բերման են ենթարկում:

Այս պահի դրությամբ, փաստորեն, երկու դեպքով էլ քրեական գործ հարուցված չէ:

Լուսանկարում՝ Սարգիս Հովհաննիսյանը