Պետական վերահսկողական ծառայության ղեկավար Ռոմանոս Պետրոսյանը վստահ է` ընդդիմության գործողությունները չեն կարող հանգեցնել իշխանափոխության: Այս մասին նա ասաց խորհրդարանում լրագրողների հետ զրույցում:

«Խորհրդարանական ընդդիմադիր ուժերն արդեն մեկ ամսից ավելի է՝ փողոցում են և որոշակի գործընթացներ են ուզում հարուցել, բայց էդ գործընթացները չեն կարողանում հատել մի քանի հազար, առավելագույնը մեկ, մեկուկես տասնյակ հազար քաղաքացիների կոնսոլիդացիան: Ակնհայտ է, որ մեր հանրությունը առնվազն քաղաքացիական ակտիվություն, իրավագիտակցություն դրսևորող հանրության շերտը անմասն է մնում այդ գործընթացներից»,-ասում է Պետրոսյանը:

Պետրոսյանի համոզմամբ` Հայաստանում առանց ժողովրդի մասնակցության որևէ քաղաքական գործընթաց, այդ թվում՝ նաև իշխանափոխություն, անհնար է:

«Ես մեր գործընկերներին խորհուրդ կտամ վերադառնալ խորհրդարան»,- ասաց նա:

Հարցին՝ կարո՞ղ է ասել, որ Արցախը չի լինելու Ադրբեջանի կազմում, Ռոմանոս Պետրոսյանն արձագանքեց.

«Ես իմ կարգավիճակով պայմանավորված` քաղաքական զսպվածություն պիտի դրսևորեմ ու այնպիսի արտահայտություններ, որոնք կարող են որոշակիորեն ներգործել բանակցային գործընթացի վրա, բնականաբար, կաշկանդված եմ ու չեմ կարող ինձ թույլ տալ»: