Ոստիկանությունը հայտնում է, որ հունիսի 3-ին Երևանի Դեմիրճյան-Պարոնյան փողոցների խաչմերուկում անհնազանդության ակցիայի կազմակերպիչների հնչեցրած կոչերի հետևանքով ակցիայի մասնակիցները դրսևորել են ոչ իրավաչափ վարքագիծ։

«Մասնավորապես, չեն ենթարկվել հասարակական կարգի պահպանություն իրականացնող ոստիկանության ծառայողների օրինական պահանջներին, բռնություն են գործադրել նրանց նկատմամբ, ինչպես նաև ոստիկանության ծառայողների ուղղությամբ նետել են շշեր, քարեր և մետաղե առարկաներ։ Տեղի ունեցածի հետևանքով, ժամը 23.00-ի դրությամբ, վնասվածքներով տարբեր բուժհաստատություններ  են տեղափոխվել ոստիկանության 34 ծառայող և 16 քաղաքացիական անձ։ Բերման է ենթարկվել 11 անձ: Հարուցվել է քրեական գործ։ Կատարվում է նախաքննություն»,- նշվում է հաղորդագրության մեջ։

Ավելի վաղ Առողջապահության նախարարությունը հայտնել էր, որ ժամը 23:00-ի դրությամբ տարբեր բժշկական կենտրոններ է տեղափոխվել 50 անձ: Նրանցից 34-ը ոստիկանության ծառայողներ են, 16-ը՝ քաղաքացիական անձինք:

Տուժածներից մեկի վիճակը ծանր է, այս պահին վիրահատվում է:

Մյուս տուժածները վնասվածքների առաջին վիրաբուժական մշակում են ստացել:

Երևանի պետական բժշկական համալսարանի աշխատակազմի ղեկավար Շուշան Դանիելյանն էլ ֆեյսբուքյան իր էջում գրել էր, որ ժամը 23: 00-ի դրությամբ տուժած քաղաքացիների թիվը «Հերացի» համալսարանական հիվանդանոցում 29 է:

«Հերացի» հիվանդանոցում տուժածներից 22-ը ոստիկաններ են, 7-ը՝ քաղաքացիական անձինք:

«Բոլոր տուժածներին տրամադրվում է անհրաժեշտ բուժօգնությունը` ողջ ծավալով, ԵՊԲՀ ռեկտոր Արմեն Մուրադյանը գտնվում է բուժհաստատությունում ու վերահսկում է ողջ գործընթացը: Տուժածներից մեկը ներկա պահին վիրահատվում է, քաղաքացիական անձ է, 1 ոստիկանի ոտքը կոտրվել է: Մյուս 27 տուժածները դեռ գտնվում են հետազոտման փուլում»,- գրել է նա:

Նշենք, որ վարչապետ Նիկոլ Փաշինյանի հրաժարականը պահանջող ընդդիմության բողոքի ակցիան այսօր ուղեկցվել է ոստիկանության հետ բախումներով։

Ֆրանսիայի հրապարակում մեկնարկած հանրահավաքը շարունակվել էր կառավարության շենքի մոտ, ապա ցուցարարները շրջափակել էին կառավարության շենքի մուտքերն ու ելքերը, իսկ հետո շարժվել դեպի կառավարական ամառանոց։

Այստեղ ցուցարարների նկատմամբ իրավապահները, ըստ մամուլի հրապարակումների, կիրառել են հատուկ միջոց՝ լուսաձայնային նռնակներ, նաև բերման են ենթարկել ցուցարարներին: 

Հիշեցնենք, որ ընդդիմության հրավիրած ԱԺ արտահերթ նիստն այսօր տապալվել էր՝ քվորում չլինելու պատճառով։

«Հայաստան» եւ «Պատիվ ունեմ» ընդդիմադիր խմբակցությունները պահանջում էին հայտարարություն ընդունել Արցախի վերաբերյալ, որով կամրագրվեր, որ «Արցախը չի կարող լինել Ադրբեջանի կազմում»:

Իշխող «Քաղաքացիական պայմանագիր»-ը բոյկոտել էր նիստը՝ հայտարարելով, որ դա կեղծ քաղաքական օրակարգ է եւ նման հայտարարությունը կարող է սահմանափակել հայկական կողմի բանակցային հնարավորությունները: