Հայաստանի Հանրապետությունը պաշտոնապես բողոքի նոտա չի փոխանցել Թուրքիայի արտաքին գործերի նախարար Մևլյութ Չավուշօղլուի կողմից Ուրուգվայի մայրաքաղաք Մոնտեվիդեոյում հայ ցուցարարների ուղղությամբ պարզած «գորշ գայլերի» ժեստի համար։ Այդ մասին «Հետք»-ի հարցմանն ի պատասխանն նշել է Արտաքին գործերի նախարարությունը։

«Տեղեկացնում ենք, որ հայկական կողմը թուրքական կողմին նոտա չի փոխանցել»,- նշվում է արտաքին քաղաքական գերատեսչության գրավոր պատասխանի մեջ։

Հիշեցնենք, որ ապրիլի 23-ին Մոնտեվիդեոյում Թուրքիայի դեսպանության շենքից մեքենայով դուրս եկող Չավուշօղլուն, տեսնելով, որ ցուցարարները սկսում են իսպաներենով վանկարկել «մարդասպան», ի պատասխան վանկարկումների՝ լայն ժպտացել էր և մատներով ցույց տվել ազգայնական «գորշ գայլերի» հայտնի նշանը: Այս ժեստից հետո Ուրուգվայի արտգործնախարարը Թուրքիայի դեսպան Հուսեյն Մուֆթուօղլուին ապրիլի 25-ին կանչել էր ԱԳՆ։

ՀՀ ԱԳՆ-ն այդպես էլ չարձագանքեց Չավուշօղլուի ժեստին։ Փոխարենը, պաշտոնական Երևանը պատասխանեց միայն ԱԺ արտաքին հարաբերությունների հանձնաժողովի նախագահի մակարդակով, մինչդեռ Ուրուգվայը այն դատապարտեց արտաքին գործերի նախարարի մակարդակով։ «Հայոց ցեղասպանության 107-րդ տարելիցի նախօրեին Թուրքիայի ԱԳ նախարար Մևլութ Չավուշօղլուի ազգայնական ժեստը՝ ցուցադրված Մոնտեվիդեոյում հայ համայնքի ներկայացուցիչներին, դատապարտելի գործողություն է և ոչ մի կերպ չի նպաստում երկու ժողովուրդների միջև փոխըմբռնման մթնոլորտի և երկխոսության ձևավորմանը»,- ֆեյսբուքյան իր էջում գրել էր Էդուարդ Աղաջանյանը։

El Pais-ի փոխանցմամբ՝ Ուրուգվայի արտաքին գործերի նախարար Ֆրանցիսկո Բուստիլյոն դատապարտել էր Չավուշօղլուի նման քայլը՝ հայտարարելով, որ Ուրուգվայը հիշողությունը հարգող, նաև խաղաղության ձգտող և ապագայի երկիր է: «Մեր երկիրն առճակատումների դեպքում հաշտեցումը նախընտրող երկիր է: Մենք քարոզում ենք փոխըմբռնում, հանդուրժողականություն և հույս ունենք, որ նրանք, որոնք այցելում են այս երկիր, որտեղ քարոզվում է խաղաղություն և հանդուրժողականություն, վարվեն նույն կերպ: Մերժում և դատապարտում եմ ցանկացած վիրավորական վարքագիծ կամ ժեստ, որը ենթադրում է ֆիզիկական կամ բարոյական բռնություն»,- ընդգծել էր Բուստիլյոն՝ Հայոց ցեղասպանության տարելիցին նվիրված միջոցառման ժամանակ։