Ուկրաինան և Մոլդովան պաշտոնապես ստացել են Եվրոպական միության անդամության թեկնածուի կարգավիճակ։ Այդ մասին իր թվիթերյան միկրոբլոգում հայտարարել է Լյուքսեմբուրգի վարչապետ Քսավյե Բետելը։ 

European Council has granted the status of candidate country to 🇺🇦 and 🇲🇩. Historic moment and a signal of hope for the Ukranian people. XB

— Xavier Bettel (@Xavier_Bettel) June 23, 2022

«Պատմական պահ և հույսի ազդանշան ուկրաինական ժողովրդի համար»,- որոշումն այսպես է մեկնաբանել Բետելը։

Իր հերթին Ուկրաինայի նախագահ Վլադիմիր Զելենսկին շնորհակալություն է հայտնել եվրոպացի առաջնորդներին աջակցության համար։ «Ի սրտե ողջունում եմ ԵՄ առաջնորդների որոշումն՝ Ուկրաինային տրամադրելու թեկնածուի կարգավիճակ։ Սա եզակի և պատմական պահ է մեր հարաբերություններում։ Ուկրաինայի ապագան ԵՄ-ում է»,- գրել է Զելենսկին։

Щиро вітаю рішення лідерів ЄС надати Україні статус кандидата. Це унікальний та історичний момент у відносинах 🇺🇦 та 🇪🇺. Вдячний @CharlesMichel, @vonderleyen і лідерам держав Євросоюзу за підтримку. Майбутнє України – в ЄС. https://t.co/o6dJVmTQrn

— Володимир Зеленський (@ZelenskyyUa) June 23, 2022

Իր հերթին Եվրոպական խորհրդի նախագահ Շառլ Միշելը հայտարարել է, որ Եվրամիության գագաթնաժողովը պատրաստ է ապագայում թեկնածու երկրի կարգավիճակ տրամադրել նաև Վրաստանին, երբ լուծված կլինեն առաջնային խնդիրները։

Նախորդ շաբաթ Եվրոպական հանձնաժողովը պաշտոնապես խորհուրդ էր տվել Ուկրաինային տրամադրել Եվրամիության անդամի թեկնածուի կարգավիճակ։ Այն մասին, որ այդ կարգավիճակը կարող է ստանալ նաև Մոլդովան, ավելի վաղ հայտարարել էր Գերմանիայի կանցլեր Օլաֆ Շոլցը։ Վրաստանին էլ որոշվել էր դեռևս չտրամադրել այդ կարգավիճակը։

Ուկրաինային ԵՄ անդամ երկրի թեկնածուի կարգավիճակ տրամադրելու որոշումը պահանջում էր Եվրոպական խորհրդի պետությունների և կառավարությունների 27 ղեկավարի միաձայն հավանությունը։

Ուկրաինան ԵՄ անդամակցության թեկնածուի կարգավիճակ ստանալու համար դիմել էր փետրվարի վերջին՝ Ռուսաստանի ներխուժումից մի քանի օր անց։ Իր հերթին Վրաստանի վարչապետ Իրակլի Ղարիբաշվիլին էլ հայտարարել էր, որ իր երկիրը «մյուս թեկնածուներից առավել շատ է արժանի Եվրամիության անդամության թեկնածու երկրի կարգավիճակ ստանալու համար»։

Լուսանկարը՝ AdobeStock-ից