ՊԵԿ-ում քննիչի պաշտոնի համար աշխատանքային ստաժի պահանջը կվերացվի․ նախագիծ
Պետական եկամուտների կոմիտեն (ՊԵԿ) առաջարկում է կոմիտեի քննչական բաժնում քննիչի պաշտոն զբաղեցնելու համար աշխատանքային ստաժի պահանջը վերացնել։ Կառավարության այս որոշման նախագիծը շրջանառության մեջ է դրվել իրավական ակտերի նախագծերի հրապարակման միասնական կայքում։
Ներկայում գործող կարգավորմամբ՝ ՊԵԿ-ի քննչական մարմնում քննիչի պաշտոնի համար՝ մինչև նշանակումը դատավորի, դատախազի, քննչական մարմինների ինքնավար պաշտոնի, փաստաբանի կամ հետաքննության մարմնի հետաքննություն կատարելու իրավասություն ունեցող աշխատակցի առնվազն 1 տարվա աշխատանքային ստաժ կամ տվյալ պաշտոններում առնվազն 1 տարվա ընդհանուր` աշխատանքային ստաժ է անհրաժեշտ։
Ինչպես ասվում է նախագծի հիմնավորման մեջ, նշված կարգավորումը առաջացնում է որոշակի դժվարություններ քննչական մարմնում պաշտոնների համալրման համար՝ հանգեցնելով տևական ժամանակ թափուր հաստիքների չհամալրմանը, միաժամանակ ծանրաբեռնելով քննչական մարմինների աշխատանքը։
Այս հանգամանքաով պայմանավորված՝ ՊԵԿ-ն առաջարկում է վերացնել աշխատանքային ստաժի պահանջը։
Հավելենք, որ նախագիծն օրինական ուժ կստանա միայն կառավարության հավանությանն արժանանալու դեպքում։
Մեկնաբանել