Ճապոնիայի նախկին վարչապետ Շինզո Աբեն մահացել է այսօր առավոտյան Ճապոնիայի Նարա քաղաքում նրա նկատմամբ տեղի ունեցած մահափորձի հետևանքով։ Այդ մասին հայտնում է ճապոնական NHK հեռուստաընկերությունը՝ հղում անելով իշխող Լիբերալ-դեմոկրատական կուսակցության բարձրաստիճան պաշտոնյային։

The New York Times-ին Աբեի մահը հաստատել է նաև Նարայի համալսարանական հիվանդանոցի պրոֆեսոր Հիդետադա Ֆուկուսիման։ Ինչպես պարզ է դառնում նրա խոսքերից, Աբեն վիրավորում է ստացել սրտի հատվածում։ Չորս ժամ շարունակ բժիշկները փորձել են կանգնեցնել արյունահոսությունը և քաղաքական գործչին 100 միավոր արյուն են փոխներարկել, սակայն նրանց չի հաջողվել վերականդենացնել նրան։ Վերջինս հաստատել էր նաև Աբեի կրտսեր եղբայրը։

TOKYO (AP) - #Japan’s NHK television says former Prime Minister Shinzo Abe has died after being shot during campaign speech

— Matt Lee (@APDiploWriter) July 8, 2022

Ինչպես ավելի վաղ գրել էինք, ճապոնական Նարա քաղաքում զինված տղամարդը կրակել է նախկին վարչապետ Շինզո Աբեի ուղղությամբ։ BBC-ն, հղում անելով ճապոնական տեղական NHK հեռուստաընկերությանն ու Կիոդո Ցուսին գործակալությանը, հայտնել էր, որ տղամարդը երկու անգամ հրազենից կրակ է արձակել Աբեի թիկունքին, երբ վերջինս ելույթ էր ունենում Նարա քաղաքում։

Գործող վարչապետ Ֆումիո Կիսիդան դադարեցրել էր իր գործարար այցը և կարգադրել բոլոր նախարարներին ժամանել Տոկիո։ Նրա խոսքով՝ Աբեն գտնվում էր ծայրահեղ ծանր վիճակում։ «Ներկայում բժիշկներն անում են ամեն ինչ, ինչ նրանց ուժերում է։ Ես հույս ունեմ և աղոթում եմ, որ նախկին վարչապետ Աբեն կհաղթահարի սա»,- ասել էր Կիսիդան։

Տոկիոյում BBC-ի թղթակից Ռուպերտ Ուինգֆիլդ Հեյզը փոխանցել էր, որ Աբեին տեղափոխել են հիվանդանոց, բայց, վերջին տվյալներով, նրա մոտ «սիրտ-թոքային համակարգի կանգ է»։ «Դա կարող է նշանակել, որ նա մահացել է, բայց դա դեռևս չի հաստատվել»,- ընդգծել էր Ռուպերտ Ուինգֆիլդ Հեյզը։

«Ֆրանսպրես» գործակալությունն էլ հստակեցրել էր, որ «սիրտ-թոքային համակարգի կանգ» ասելով ճապոնացիներն ի նկատի ունեն կլինիկական մահը։

Կասկածյալը 41-ամյա Յամագամի Տեցույան է, որը դեպքի վայրում ձերբակալվել էր ոստիկանության կողմից։ Առգրավվել էր նրա մոտ գտնվող զենքը։ Տղամարդը ձերբակալության ժամանակ դիմադրություն ցույց չէր տվել։

Former Prime Minister Shinzo Abe shot during a stump speech in Nara; suspected gunman arrested

See video on our website:https://t.co/HMWRygYhG7 pic.twitter.com/Y3vwVpv74j

— Asahi Shimbun AJW (@AJWasahi) July 8, 2022

67-ամյա Շինզո Աբեն վարչապետի պաշտոնը լքել էր 2020 թվականին, սակայն շարունակում էր ազդեցիկ անձ լինել Ճապոնիայի իշխող Լիբերալ-դեմոկրատական կուսակցությունում։ «Սա մեծ շոկ է Ճապոնիայի բնակիչների համար. երկիր, որտեղ հրազեն ունենալը խիստ սահմանափակված է, իսկ քաղաքականության մեջ բռնություն գրեթե չկա»,- նշում էր BBC-ի թղթակիցը։

«Ֆրանսպրես» գործակալությունն էլ, հղում անելով ճապոնական NHK հեռուստաընկերության զրուցակցին, գրում էր, որ Աբեն ելույթ ունենալիս է եղել, երբ հետևից նրան մոտեցել է տղամարդը։ «Առաջին կրակոցը հնչել է հանկարծակի է եղել։ Երկրորդ կրակոցն առավել լավ տեսանելի էր, երևում էին պայթյունն ու ծուխը»,- ասել էր ճապոնական հեռուստատեսության զրուցակիցը։

Շինզո Աբեի ելույթը պայմանավորված էր առաջիկա կիրակի օրը նախատեսվող Ճապոնիայի խորհրդարանի վերին պալատի ընտրություններով, որտեղ նա իր աջակցությունն էր հայտնում թեկնածուներից մեկին։

Աբեն Ճապոնիայի վարչապետի պաշտոնը զբաղեցրել է երկու անգամ և արդյունքում դարձել ամենաերկարն այդ պաշտոնն զբաղեցրած անձը։

2020 թվականին նա հեռացել էր վարչապետի պաշտոնից՝ դա պայմանավորելով առողջական խնդիրներով, սակայն, ինչպես գրում է BBC-ն, պահել էր իր ազդեցությունն իշխող Լիբերալ-դեմոկրատական կուսակցությունում և վերահսկում էր կուսակցության գլխավոր խմբակցություններից մեկը։ Ներկայիս վարչապետ Ֆումիո Կիսիդան Աբեի հովանավորյալն էր։ 

Շինզո Աբեի հայրը ժամանակին եղել է Ճապոնիայի ԱԳ նախարար։ Առաջին անգամ վարչապետի պաշտոնն Աբեն զբաղեցրել էր 2006 թվականին և այդ պահին դարձել հետպատերազմական Ճապոնիայի պատմության ամենաերիտասարդ վարչապետը։ Աբե վարչապետի կառավարման առաջին տարին հագեցած էր սկանդալներով, իսկ նրա կուսակցությունն ուներ քաղաքական խնդիրներ, ինչի պատճառով մեկ տարի անց Շինզո Աբեն հրաժարական էր տվել։

Հաջորդ անգամ Աբեն Ճապոնիայի կառավարության ղեկավարի պաշտոնն ստանձնել էր 2012 թվականին և այդ պաշտոնին մնացել մինչև 2020 թվականը։ 

Լուսանկարը՝ Շինզո Աբեի թվիթերյան էջից