«Քաղաքացիական պայմանագիր» խմբակցությունը ընդդիմադիրներին մանդատներից զրկելու համար Սահմանադրական դատարան չի դիմի: Այս մասին ԱԺ խորհրդի նիստից հետո լրագրողների հետ զրույցում ասաց ԱԺ փոխխոսնակ Ռուբեն Ռուբինյանը:

Ազգային ժողովի խորհուրդը նիստ էր հրավիրել` ընդդիմադիր պատգամավորների լիազորությունների դադարեցման հարցով Սահմանադրական դատարան դիմելու համար, որին ներկա էին միայն ՔՊ-ականները:

«Մի քանի ընդդիմադիր պատգամավորների` ԱԺ-ում իրենց պաշտոններից հեռացնելով, ԱԺ հանձնաժողովների աշխատանքների կազմակերպման խնդիրը կարելի է համարել լուծված»,-ասաց նա:

Ռուբինյանի վստահեցմամբ` իշխանության քաղաքական հավատամքի մեջ է մտնում հարգանքն առ ժողովրդի տված քվեն:

«Մենք հարգում ենք ժողովրդի տված քվեն, և կարծում ենք, որ ընդդիմության այս վարվելակերպը, փիլիսոփայությունը ընտրողների համար պետք է խնդիր լինի, և կարծում եմ՝ ժողովրդի այն հատվածը, որը քվե է իրենց տվել, համապատասխան հետևություններ կանի»,- ասաց Ռուբեն Ռուբինյանը: