Սկիզբն այստեղ․

Վերջին շրջանում «Fly One Armenia» ավիաընկերության շուրջ բողոքների և դժգոհությունների նոր ալիք բարձրացավ։ Ուղևորներից ոմանք չեն կարողանում ստանալ չեղարկված կամ հետաձգված թռիչքների իրենց փոխհատուցումները։ Մարդիկ դժգոհում են, որ չվերթները նախատեսված ժամից մի քանի ժամ առաջ հետաձգվում են՝ առաջացնելով անորոշություն։ 

Այս հարցերի շուրջ փորձել ենք պարզաբանում ստանալ «Fly One Armenia» ավիաընկերության տնօրենների խորհրդի նախագահ Արամ Անանյանից։

Վերջերս «Fly One Armenia»-ն հաճախ է հայտնվում հանրության ուշադրության կենտրոնում՝ ոչ դրական իմաստով։ Ինչո՞վ է սա պայմանավորված։

Ժամանակակից ավիացիայում անորոշությունների թիվն այնքան մեծ է, որ պարբերաբար որոշ խնդիրներ են առաջանում, որոնք մենք հետևողականորեն փորձում ենք լուծել։ Միաժամանակ, հասկանում ենք, որ հանրության ուշադրությունը մեզ վրա է սևեռված, քանի որ նոր ավիափոխադրող ենք, իսկ մարդիկ ակնկալիքներ ունեն, երկար ժամանակ սպասել են, որ հայկական ավիափոխադրող լինի շուկայում։

Խնդիրներ առաջանում են բազմաթիվ օբյեկտիվ և սուբյեկտիվ պատճառներով։ Ես հավաստիացնում եմ, որ իրականության և խնդիրների հարաբերակցությունն անպիսին չէ, ինչպիսին հակված ենք ասելու։ Իհարկե, մեզ համար ամեն դեպքն է կարևոր, մենք գործ ունենք մեր մարդկանց, մեր հարազատների հետ, ովքեր ճամփորդում են մեր ավիաընկերության օդանավերով։ Մեր ցանկությունը Հայաստանում սիրված բրենդ դառնալն է, և մենք մեկ օրվա համար չէ, որ դաշտ ենք մտել։ Նպատակ ունենք առաջիկա մեկ տարվա ընթացքում ուղևորների քանակը մեկ միլիոնի հասցնել։

Հուլիս 8-ին, օդանավում առաջացած տեխնիկական խնդրի պատճառով Ստամբուլ-Երևան չվերթի բազմաթիվ ուղևորներ ստիպված էին մոտ 20 ժամ սպասել։ Նրանք չեն ապահովվել ո՛չ սննդով և ո՛չ կեցավայրով։ «Fly One Armenia»-ն պատրաստվո՞ւմ է փոխհատուցել նրանց։

Մեզ համար մեր ուղևորների անվտանգությունը սակարկման ենթակա չէ, և տվյալ պահին օդաչուի կայացրած որոշումը եղել է խիստ արդարացված։ Ուզում եմ երաշխավորել, որ այսուհետ ամեն բան անելու ենք նման միջադեպերը նվազագույնի հասցնելու համար։ Այս պահին ես ինչ էլ ասեմ, միևնույնն է՝ հասցված անհարմարությունը փոխհատուցվելու է միայն մեր հետագա բնականոն աշխատանքով։

Ինչ վերաբերում է փոխհատուցմանը, ցանկացած նման դեպք ուսումնասիրվելու է, դրա համար մենք ունենք հատուկ ընթացակարգ։ Բոլոր դժվարությունները, որոնք կրել են ուղևորները, անպայման, ըստ մեր պարամետրերի, կուսումնասիրվեն և կփոխհատուցվեն։ Պետք է ամբողջ ծավալով հասկանանք, թե ինչ է տեղի ունեցել Ստամբուլում և փակենք բոլոր անհարմարությունները, որ կրել են ուղևորները։

«Անձամբ իմ անունից երաշխավորում եմ, որ ցանկացած նման դեպք լինելու է թե՛ իմ, թե՛ ավիաընկերության ուշադրության կենտրոնում։ Սա բնավ բարի կամքի դրսևորում չէ, այլ մեր պարտականությունները մեր ուղևորների նկատմամբ»․ Արամ Անանյան

 

Ի՞նչ սկզբունքով է «Fly One Armenia»-ն իրականացնում ուղևորների փոխատուցումները, ինչո՞ւ են շատերը դժգոհում, որ չեղարկված թռիչքներից հետո չեն կարողանում փոխհատուցում ստանալ։

Որևէ առումով մենք խնդիր չունենք ինչ-որ մեկի տոմսը չփոխհատուցելու, չմատուցված ծառայության համար վճարված գումարը չի կարող մնալ մեզ մոտ։ Ծավալը, որի հետ մեր մասնագետներն աշխատում են և լուծումները, որ տալիս են, հասնում են բացարձակ մեծամասնության, բայց նույնիսկ չպետք է մնան այդ հատուկենտ միջադեպերը։

Այն տոմսերը, որոնք անմիջապես մեզնից են գնվում, վերադարձը կազմակերպվում է շատ արագ։ Հիմնականում խնդիր առաջանում է այն դեպքերում, երբ տոմսերը գնվում են տուրիստական գործակալության, տարբեր հարթակների կամ կայքէջերի միջոցով։ Հաճախ գումարը, որ մենք փոխանցում ենք միջնորդին, այդպես էլ ուղևորին չի հասնում։ Խնդրում ենք մարդկանց, որ դիմում գրեն իրենց միջնորդ կազմակերպությանը, որպեսզի ստանան վերադարձը։ Սա է պատճառներից մեկը, որ պրոցեսը երկարում է։ Ամեն դեպք ունի իր առանձնահատկությունը ու ասել, որ դրանք զանգվածային են՝ ճիշտ չէ։ Պետք է հասկանալ խնդիրը որ կետում է առաջացել ու լուծել այն։

Եթե 100 հազ․ ուղևորի հարաբերակցությունը համեմատենք դիմումների և բողոքների քանակի հետ, ապա կտեսնենք, որ մեկ տոկոսի էլ չի հասնում։ Միաժամանակ, ինձ համար ամեն մի դեպքն է կարևոր և հնարավորության դեպքում բոլորի հետևից փորձում եմ գնալ։ 

Ինչպե՞ս եք գնահատում «Fly One Armenia»-ի հասանելիությունը ուղևորների համար։ Շատերը բողոքում են, որ բավականին բարդ է ավիաընկերության հետ կապ հաստատելը թե՛ հեռախոսազանգի, թե՛ էլ․ փոստի միջոցով։

Նման մտահոգություններ ստանում ենք մեր ուղևորներից, բայց վիճակագրությունը, որը տարվում է էլեկտրոնային, ցույց է տալիս, որ առաջացած խնդիրների 80%-ը միանգամից առաջին մակարդակում լուծվում է։ Պատասխանների տոկոսը նույնպես հասնում է բացարձակ մեծամասնության, եթե այդ պահին չեն միացել, նորից խնդրում եմ մեր ուղևորների փոքր համբերությունը և առաջարկում փորձել կապվել մեզ հետ այլ հնարավոր եղանակներով, որոնք նշված են կայքում։ 

Երկրորդ մակարդակում արդեն պահանջների և հատուցումների հետ կապված դիմումներն են, որոնք ուսումնասիրվում են մեր մասնագետների կողմից ու լուծումներ ստանում։ Ամեն դեպքում, ուղևորները մեզ հետ կապվելու ճանապարհներ գտնում են։ Պատահում է, որ մեկ օրվա մեջ նույն մարդը մեզ հետ յոթ անգամ կապ է հաստատում, ուստի դժվար է հասկանալ, թե ինչպես մեկը կարող է այդքան անգամ կապվել, իսկ մյուսը՝ ոչ մի։ Երբեմն պատահում է, երբ տեսնում ենք զանգերի քանակը շատ է, ներգրավում ենք մեր այլ գործընկերների։ Այս պահին դիտարկում ենք նաև զանգերի կենտրոնի ընդլայնման հնարավորությունները։

Մարդիկ, ովքեր մեզ դիմել են, կարող են հավաստել, որ խնդիրը հենց առաջին մակարդակում շատ արագ լուծվում է, չլուծված խնդիրներն են սովորաբար, որ քանակական այդ ծավալը դարձնում են հանրային մտայնություն, մեր խնդիրն այդ մտայնությունը ցրելն է։

Տեսանյութը՝ Անի Սարգսյանի։

Գլխավոր լուսանկարում՝ ER-00002-ը՝  Դուբլինում, Իռլանդիա 30.03.2018, հեղ.՝ Թովթուլ Վասիլի, jetphotos.com