Ոստիկանությունը, ԱԻՆ-ն ու Միգրացիոն ծառայությունը կմիաձուլվեն ներքին գործերի նախարարությունում
Արդարադատության նախարարությունն առաջարկում է ոստիկանության, Արտակարգ իրավիճակների նախարարության և Միգրացիոն ծառայության միաձուլման արդյունքում ստեղծել ներքին գործերի նախարարություն (ՆԳՆ)։ Համապատասխան օրենքների նախագծերի փաթեթը հանրային քննարկման է դրվել իրավական ակտերի նախագծերի հրապարակման միասնական կայքում։
Նախատեսվող կառուցվածքային փոփոխությունների արդյունքում՝ ստեղծվելիք ներքին գործերի նախարարության ենթակա մարմիններ են լինելու ոստիկանությունը, Միգրացիայի և քաղաքացիության ծառայությունը, Փրկարար ծառայությունը։
Գործող գերատեսչությունների գործառույթներում ևս տեղի են ունենալու մի շարք փոփոխություններ։ Օրինակ՝ անձնագրերի և վիզաների հարցերով զբաղվելու է ոչ թե ոստիկանության համապատասխան վարչությունը, ինչպես ներկայում է, այլ Միգրացիոն և քաղաքացիության ծառայության անձնագրային բաժինը, վիզաների և կացության բաժինը։
Ներկայում գործող Արտակարգ իրավիճակների նախարարությունը կդառնա Փրկարար ծառայություն։ Նախագծի հիմնավորման մեջ ասվում է, որ ԱԻՆ-ի գործառույթները ՆԳՆ-ին վերապահելը պայմանավորված է աղետների ու այլ ճգնաժամային իրավիճակներում մեկ կետից կառավարվող և միմյանց փոխլրացնող արձագանքի ապահովման անհրաժեշտությամբ, ինչպես նաև նյութատեխնիկական, կարողությունների փոխլրացման ու կառավարման, ռեսուրսների համատեղ օգտագործման նպատակահարմարությամբ:
Ներքին գործերի նախարարության ենթակայության տակ են լինելու նաև Ոստիկանության կրթահամալիրն ու ԱԻՆ-ի Ճգնաժամային կառավարման պետական ակադեմիան։
Ենթակա մարմինների ղեկավարներին նշանակելու է ՀՀ վարչապետը՝ ներքին գործերի նախարարի առաջարկությամբ։
Հավելենք, որ այս օրենքների նախագծերի փաթեթը օրինական ուժ ստանալու համար նախ պետք է արժանանա կառավարության հավանությանը, ապա ընդունվի նաև Ազգային ժողովի կողմից։ Սահմանված կարգով ընդունվելու դեպքում այս փոփոխությունները ուժի մեջ կմտնեն պաշտոնական հրապարկմանը հաջորդող տասներորդ օրը։
Մեկնաբանել