Կարևոր է, որ Հայաստանը հնարավորինս շուտ կատարի եռակողմ հայտարարությամբ սահմանված իր պարտավորությունները։ Այդ մասին, Anadolu գործակալության փոխանցմամբ, Ռուսաստանից վերադարձի ճանապարհին հայտարարել է Թուրքիայի նախագահ Ռեջեփ Թայիփ Էրդողանը։

«Ադրբեջանն իր բնույթով չի ցանկանում, որ իր տարածքում լինեն ինչ-որ անօրինական զինված տարրեր։ Եռակողմ հայտարարության պահից անցել է գրեթե երկու տարի։ Կարևոր է, որ Հայաստանը որքան հնարավոր է արագ կատարի իր պարտավորությունները»,- հայտարարել է Էրդողանը՝ պատասխանելով վերջին օրերին Արցախում հայ-ադրբեջանական լարվածության մասին հարցին։ 

Էրդողանի խոսքով՝ Վլադիմիր Պուտինի հետ հանդիպման ժամանակ ռուսական կողմը ևս Հայաստանին և Ադրբեջանին սթափության կոչ է արել։

Իրավիճակը վերջին օրերին բավականին լարված էր Արցախում։ Պաշտպանության բանակի տարածած վերջին հաղորդագրության համաձայն՝ օգոստոսի 5-ի լույս 6-ի գիշերը և օգոստոսի 6-ի առավոտյան 09:00-ի դրությամբ օպերատիվ իրադրությունը, չնայած որոշակի լարվածությանը, հարաբերականորեն կայուն է եղել։ Շփման գծի որոշ հատվածներում ադրբեջանական զինուժը խախտել է հրադադարի պահպանման ռեժիմը՝ կիրառելով տարբեր տրամաչափի հրաձգային զինատեսակներ։ Վերջին օրերին, սակայն, հայկական կողմն ունեցել էր կորուստներ՝ հիմնականում անօդաչուներից արձակված կրակի պատճառով։

Լուսանկարը՝ Anadolu գործակալության