Սուրմալուի տոնավաճառի պայթյունի հետևանքով արձանագրված զոհերի թիվը 16 է, անհետ կորած է համարվում երկու քաղաքացի:

Լրագրողների հետ զրույցում ասաց արտակարգ իրավիճակների նախարար Արմեն Փամբուխչյանը:

«Փաստացի երկու անհետ կորած ունենք, 16 հայտնաբերված դի, որից մեկի ինքնությունը չի պարզվել: Ենթադրելի է, որ երկու անհետ կորածներից մեկի ինքությունը որ պարզվի, կմնա մեկ անհետ կորած քաղաքացի»,-ասաց նախարարը:

Իսկ հարցին, թե ինչպես է անհետ կորած երեք քաղաքացիների թիվը դարձել երկու, նախարարն ասաց, որ ՌԴ քաղաքացին, որն անհետ կորած էր համարվում, հայտնաբերվել է. նա դեպքի վայրում չի եղել:

Ըստ նախնական տվյալների` տոնավաճառի տարածքում 4 տոննա պայթուցիկ նյութեր են եղել:

Նախարարի խոսքով` անհետ կորած քաղաքացիների որոնման աշխատանքները հիմնականում կիսակառույց շենքում են իրականացվում:

Փամբուխչյանը հիշեցրեց, որ փրկարարներին այսօր հաջողվել է հրդեհն ամբողջությամբ մարել, այժմ տեղ-տեղ հովացման աշխատանքներ են արվում ու ինտենսիվ կերպով կուտակված փլատակները տեղափոխվում:

Ինչ վերաբերում է աշխատանքների ավարտից հետո տոնավաճառի շենքի ապամոնտաժմանը, նախարարն ասաց, որ դեռ պետք է հասկանան` ինչպես է այն ապամոնտաժվելու:

«Մենք հակված ենք, որ դա կատարեն մասնագիտացած ապամոնտաժող կազմակերպությունները»,-ասաց նա:

Օգոստոսի 14-ին, ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ «Սուրմալու» առևտրի կենտրոնում տեղի է ունեցել պայթյուն։ Որոնողափրկարարական աշխատանքների արդյունքում հայտնաբերվել է 16 քաղաքացու դի, անհետ կորած է համարվում երկու քաղաքացի: Երկու օրերի ընթացքում ժամանակ առ ժամանակ բռնկվող հրդեհը մեկուսացվել է այսօր` օգոստոսի 16-ին, ժամը 14։38-ին, մարվել՝ 17։49-ին: Կիառավարությունը օգոստոսի 17-ին և 18-ին սգո օրեր է հայտարարել: