Շառլ Միշելը ողջունել է 5 հայ ռազմագերու վերադարձը
Եվրոպական խորհրդի նախագահ Շառլ Միշելը ողջունել է նախօրեին Ադրբեջանի կողմից 5 հայ ռազմագերու վերադարձը։ Նման գրառում նա կատարել է թվիթերյան իր միկրոբլոգում։
Welcome release by Baku of five more Armenian detainees, following 31/8 discussions in Brussels.
— Charles Michel (@CharlesMichel) September 9, 2022
That handover is taking place bilaterally is a first - and to both 🇦🇿 and 🇦🇲 credit.
Addressing all outstanding humanitarian issues is a key priority.@azpresident @NikolPashinyan
«Ողջունում եմ Բաքվի կողմից հայ ևս 5 պահվող անձանց ազատ արձակումը՝ Բրյուսելում օգոստոսի 31-ի քննարկումներից հետո։ Հանձնումը տեղի է ունեցել երկկողմ ձևաչափով բանակցության արդյունքում, ինչն Ադրբեջանի և Հայաստանի ձեռքբերումն է։ Առկա հումանիտար բոլոր խնդիրների լուծումն առանցքային առաջնահերթություն է»,- գրել է Շառլ Միշելը։
Հիշեցնենք, որ նախօրեին հայտնի դարձավ, որ Ադրբեջանի գերագույն դատարանում կայացել է Հայաստանի 4 քաղաքացիների նկատմամբ շինծու գործով կայացված դատավճռի բողոքարկման դատական գործընթացը, որի հետևանքով հայ ռազմագերիներն ազատ էին արձակվել։ Սկզբում ազատ արձակված գերիների անունները չէին նշվում։
Ավելի ուշ ՀՀ Ազգային անվտանգության ծառայությունը հայտնեց, որ ադրբեջանական կողմը հայկական կողմին վերադարձրել է հինգ հայ ռազմագերի: «Ողջունում ենք այս գործողությունը՝ որպես հարաբերությունների կարգավորմանը նպաստող քայլ»,- նշվում էր ԱԱԾ հաղորդագրության մեջ։
ԱԱԾ-ն նաև հրապարակել էր ադրբեջանական գերությունից վերադարձածների անունները։ Նրանք էին՝ Մարտին Աղրամանյան, Աշոտ Գևորգյան, Ֆելիքս Գրիգորյան, Վարազդատ Մանուկյան և Էդիկ Հովսեփյան։
Լուսանկարը՝ ՀՀ կառավարության
Մեկնաբանել