Այսօր ձերբակալվել է փաստաբան Էրիկ Ալեքսանյանը: Նրան մեղադրանք է առաջադրվել: Լուրը հաստատեց Փաստաբանների պալատի մամուլի խոսնակ Սիլվարդ Տիգրանյանը:  

Գլխավոր դատախազությունից փաստաբանի անուն չեն հայտնում՝ գաղտնիությունից ելնելով, սակայն նշում են, որ «փաստաբանին առաջադրված մեղադրանքը փոխկապակցված է Բարձրագույն դատական խորհուրդ ներկայացված «միջնորդության փաստական տվյալների հետ»:

Հիշեցնենք, որ այսօր գլխավոր դատախազը միջնորդություն է ներկայացրել ԲԴԽ դատավոր Արուսյակ Ալեքսանյանի նկատմամբ քրեական հետապնդում հարուցելու վերաբերյալ համաձայնության հարցով: Ըստ գլխավոր դատախազության, ստացվում է, որ նույն գործի շրջանակներում է մեղադրանք առաջադրվել փաստաբանին:

Հայտնի չէ, թե որ հոդվածով է փաստաբան Ալեքսանյանին մեղադրանք առաջադրվել:

Վարույթն իրականացնող մարմինը փաստաբանին ձերբակալելու մասին տեղեկացրել է Փաստաբանների պալատի նախագահին: