Երևան քաղաքի ընդհանուր իրավասության դատարանի դատավոր Արուսյակ Ալեքսանյանը կկալանավորվի: Քիչ առաջ նման որոշում կայացրեց նույն դատարանի դատավոր  Ռազմիկ Մարիկյանը:

Դատավոր Արուսյակ Ալեքսանյանը մեղադրվում է պաշտոնեական լիազորություններն անցնելու և ակնհայտ անարդար դատական ակտ կայացնելու մեջ։

• ԲԴԽ-ն դատավոր Արուսյակ Ալեքսանյանին ազատությունից զրկելու համաձայնություն է տվել

Հիշեցնենք, որ Բարձրագույն դատական խորհուրդը հոկտեմբերի 17-ին բավարարել էր գլխավոր դատախազի միջնորդությունը՝ դատավոր Արուսյակ Ալեքսանյանին անձեռնամխելիությունից զրկելու վերաբերյալ:

ԲԴԽ-ն համաձայնություն է տվել դատավոր Ալեքսանյանի նկատմամբ հարուցել քրեական հետապնդում և զրկել ազատությունից:

«Աջափնյակ 1 նստավայրի դատավոր Արուսյակ Ալեքսանյանը կալանավորվեց Աջափնյակ 1 նստավայրի դատավորի կողմից։ Իհարկե այլ բան չէինք էլ սպասում, քանզի վերջին ժամանակներում դատարանների և դատավորների շուրջ տեղի ունեցող իրադարձությունները միանշանակ ուղղված են հլու-հնազանդ դատական համակարգ ձևավորելուն (ինչպես և խոստացել էին)»,- ֆեյսբուքյան էջում գրառում է արել դատավոր Ալեքսանյանի փաստաբան Երեմ Սարգսյանը:

Փաստաբանը նաև նշել է, թե դժվար է պատկերացնել, որ ԲԴԽ-ի կողմից դատավոր Արուսյակ Ալեքսանյանին կալանավորելու համաձայնություն տալը, նրան ԱԱԾ-ի կողմից ձերբակալելը և կալանավորման միջնորդություն ներկայացնելը չէր ազդելու դատավորների, առավել ևս Աջափնյակ 1 նստավայրի դատավորների վրա, որպեսզի ԱԱԾ-ն և դատախազությանը հակառակ որոշում կայացնելուց առաջ ևս 10 անգամ մտածեն ու ապահովագրվելու, շառից ու փորձանքից հեռու մնալու համար չմերժեն նրանց միջնորդությունները։

«Կալանքն ինչպես կար, այնպես էլ մնում է միակ խափանման միջոցը, իսկ չկալանավորելու ցանկությունը կախված է միայն մեղադրանքի կողմից (եթե իհարկե ցանկալի ցուցմունք կտաս)»,- ավելացրել է Երեմ Սարգսյանը:

• Ձերբակալվել է փաստաբան Էրիկ Ալեքսանյանը

Նշենք, որ նույն գործով մեղադրանք է առաջադրվել նաև փաստաբան Էրիկ Ալեքսանյանին: