Նիկոլաևի հրթիռակոծման հետևանքով զոհվել է 6 մարդ
Ուկրաինայի Նիկոլաև քաղաքի հրթիռակոծման ժամանակ հրթիռներից մեկն ընկել է բնակելի շենքերից մեկի վրա, որի հետևանքով զոհվել է 6 մարդ։ Այդ մասին հայտարարել է Նիկոլաևի քաղաքապետ Ալեքսանդր Սենկևիչը։
Վնասվել են բնակելի շենքի առաջինից հինգերորդ հարկերը։ Ինչպես հայտարարել է մարզային վարչակազմի ղեկավար Վիտալի Կիմը, Նիկոլաևը հրթիռակոծման է ենթարկվել նոյեմբերի 11-ի առավոտյան, ենթադրաբար, С-300 զենիթահրթիռային համակարգերից։ Վնասվել են նաև բնակելի տներ, որոնք գտնվում էին շենքի մոտ։ Որոնողափրկարարական աշխատանքները շարունակվում են։
Ուկրաինայի նախագահ Վլադիմիր Զելենսկին Նիկոլաևի հրթիռակոծությունն անվանել է «ռազմաճակատում մեր հաջողություններին ահաբեկիչ պետության ցինիկ պատասխան»։ «Ռուսաստանը չի դադարեցնում իր ստոր մարտավարությունը։ Իսկ մենք չենք դադարեցնում մեր պայքարը»,- գրել է Զելենսկին։
Հիշեցնենք, որ նոյեմբերի 9-ին Ռուսաստանի պաշտպանության նախարար Սերգեյ Շոյգուն ռուսական զորքերին հրամայել էր դուրս գալ Խերսոնից և անցնել Դնեպր գետի մյուս ափը։ Հեռանալուց հետո Ռուսաստանը կորցրեց Նիկոլաևի մարզի գրավված հատվածը և Խերսոնի մարզի մի հատվածը։ Ֆորմալ առումով Խերսոնը «Ռուսաստանի կազմում մնաց» ուղիղ 41 օր։
Լուսանկարը՝ Սենկևիչի տելեգրամյան ալիքից
Մեկնաբանել