Քաթարում ընթացող ֆուտբոլի աշխարհի գավաթի խաղարկությունում գրանցվեց առաջին մեծ անակնկալը։ Սաուդյան Արաբայի ազգային հավաքականը 2։1 հաշվով կամային հաղթանակ տարավ առաջնության գլխավոր ֆավորիտներից մեկի՝ Արգենտինայի ընտրանու նկատմամբ։

Հանդիպման հաշիվը բացվեց 10-րդ րոպեին։ Արգենտինացիների առաջատար Լիոնել Մեսսին հստակ իրացրեց նշանակված 11-մետրանոց հարվածը։ Երկրորդ խաղակեսի մեկնարկում Սաուդյան Արաբիայի խաղացողները 5 րոպեի ընթացքում միանգամից երկու գոլ խփեցին։ 48-րդ րոպեին աչքի ընկավ Սալեհ Ալ Շեհրին, իսկ 53-րդ րոպեին Սալեմ Ալ Դոսարին առաջ խփեց իր թիմի հաղթական գնդակը։

Խաղի մնացած ժամանակահատվածում արգենտինացիները անդադար գրոհում էին և փորձում էին փրկել վատ դասավորված հանդիպումը, սակայն սաուդցիները հաջողությամբ հետ մղեցին բոլոր գրոհները և հաղթանակի հասան։

Հարկ է նշել, որ 36 խաղ անընդմեջ Արգենտինայի հավաքականը ոչ մի պարտություն չէր կրել որևէ մրցաշարում, և այսօր Սաուդյան Արաբիան վերջ դրեց արգենտինացիների անպարտելի շարքին։

Արգենտինայի և Սաուդյան Արաբիայի հավաքականները ընդգրկված են C խմբում։ Այս խմբի մյուս հանդիպումը, որտեղ կմրցեն Մեքսիկայի և Լեհաստանի ազգային ընտրանիները, կմեկնարկի այսօր՝ Երևանի ժամանակով 20։00-ին։

Բացի նշած խաղից, այսօր տեղի կունենան նաև D խմբի հանդիպումները․ 17։00-ին՝ Դանիա-Թունիս, 23։00-ին՝ Ֆրանսիա-Ավստրալիա։