«Մի քանի օրից Երևանում կմեկնարկեն համալիր միջոցառումներ, որով մենք ազդարարում ենք ամանորյա տոնական ծրագրի սկիզբը։ Այս միջոցառումներն ընդգրկում են մայրաքաղաքի բոլոր վարչական շրջանները, իսկ դրանց համերգային հատվածը կենտրոնացված կլինի Հանրապետության հրապարակում և 2750- ամյակին նվիրված պուրակում»,- այս մասին այսօր՝ դեկտեմբերի 2-ին, Երևանի քաղաքապետարանում կայացած մամուլի ասուլիսի ընթացքում հայտնեց փոխքաղաքապետ Տիգրան Ավինյանը։

Վերջինս նշեց նաև, որ այս տարվա տոնական լուսավորությունը լինելու է բացառիկ։

Ըստ Ավինյանի՝ ամանորյա զարդարանքների պատճառով շենքերի պատերին մետաղյա ձողերի ու անցքերի հետքերը վերականգնվելու է, քանի որ աշխատանքային խմբերից քաղաքապետարանի առաջնային պահանջը եղել է շենքերի անվնաս վերադարձը նախնական տեսքի։

«Դեռևս շատ հին ժամանակներից այդ շենքերի վրա եղել են տարատեսակ անցքեր, մետաղյա ձողեր են մնացել, որոնց վերացման աշխատանքները նույնպես մեր ուշադրության կենտրոնում է լինելու գարնանը»,-ասաց նա, հավելելով նաև, որ գարնանը պատմամշակութային հուշարձանների հետ կապված մեծ ծրագիր է նախատեսված։

Քաղաքում գործելու է նաև Սուրբծննդյան տոնավաճառ, որը տեղակայված կլինի Երևանի 2750-ամյակին նվիրված պուրակում, որը գործելու է այս տարվա դեկտեմբերի 5-ից մինչև 2023 թվականի հունվարի 6-ը։