Կատարում ընթացող Ֆուտբոլի աշխարհի առաջնության ամենաթեժ օրերին՝ քառորդ եզրափակիչ խաղերի ժամանակ, Դոհայում՝ սպորտային ամենակարևոր իրադարձության էպիկենտրոնում, ընթանում էին Կատարի ֆիլհարմոնիկ նվագախմբի փորձերը: Նվագախմբի ֆուտբոլասեր երաժիշտները շատ դեպքերում ստիպված էին, դիտել նույն քաղաքում ընթացող խաղերի կրկնությունը. փորձերը համընկնում էին խաղերի հետ: Նվագախմբի տարբեր ազգության (հիմնականում եվրոպացի) երաժիշտների հիմնական կազմի փորձերին դեկտեմբերի 8-ից միացել էր նաև Հայաստանից ժամանած 25 հոգանոց երաժիշտների խումբը:  

Հայաստանի պետական օպերային, սիմֆոնիկ, ֆիլհարմոնիկ նվագախմբերի երաժիշտներից կազմված խումբը, պրոդյուսեր Նիկա Բաբայանի նախաձեռնությամբ միացել էր Կատարի ֆիլհարմոնիկ նվագախմբին՝ կատարելու Սալեմ Աբդուլ-Կարեմի «Կատարական սիմֆոնիա»-ն: Կատարի կառավարությունը ֆուտբոլի առաջնության մշակութային ծրագրերի շրջանակում կազմակերպել էր երաժշտական փառատոն, որը դեկտեմբերի 11-ին բացեց «Կատարական սիմֆոնիա»-ն: Համերգին ներկա էր փառատոնի կազմակերպիչ Qatar Foundation կրթական, գիտական հիմնադրամի նախագահ Մոզա բինտ Նասեր ալ Միսնեդ, որը Կատարի էմիրի մայրն է:

«Կատարական սիմֆոնիա»-ն համարվում է երկրի երաժշտական այցեքարտը: Հեղինակը կատարական ազգային մեղեդիները, բարդ մետրոռիթմերը, քառորդ տոները «թարգմանել» է դասական երաժշտության լեզվով: Ծրագրային սիմֆոնիայի չորս մասերն են՝

1. The Beginning (Սկիզբ)
2. The Dream (Երազանք)
3. The Challenge and Achievement (Մարտահրավեր և ձեռքբերում)
4. Forward (Առաջ)

Կոմպոզիտորը «պատմում է» երկրի մասին. խուլ անապատներից մինչև զարգացած, ծաղկող պետություն: Համերգի օրը՝ հեղինակի դիրիժորությամբ սիմֆոնիայի կատարման ընթացքում, մեծ էկրանների վրա զուգահեռ ցուցադրվում էին երկրի զարգացման մասին պատմող վավերագրական կադրեր: Սալեմ Աբդուլ-Կարեմը ցանկանում է ծանոթացնել աշխարհին Կատարի մշակութային կողմին, որպեսզի ճանաչեն երկիրը ոչ միայն իր նավթագազային արդյունաբերությամբ և երկնաքերերով, այլև իր հարուստ պատմամշակութային անցյալով:

Հայ երաժիշտների և «Կատարական սիմֆոնիա»-ի կապը տարիների պատմություն ունի, երաժշտական պրոդյուսեր Նիկա Բաբայանի և հեղինակի համագործակցության արդյունքում, հայ երաժիշտները եղել են ստեղծագործության առաջին կատարողները և այս ծրագրով շրջագայել են աշխարհի տարբեր երկրներում:

Լուսանկարները՝ Ռուբեն Մարտիրոսյանի