Արցախի «Հանրապետական բժշկական կենտրոն»-ում 11 բուժառու գտնվում է ռեանիմացիոն բաժանմունքում, որից 4-ը գտնվում են ծայրահեղ ծանր վիճակում։

«Արևիկ բուժմիավորումում» 10 երեխա գտնվում է ռեանիմացիոն բաժանմունքում: Երեխաներից մեկը գտնվում է ծայրահեղ ծանր վիճակում: Արցախի բժիշկները անհրաժեշտ բուժօգնությունը ցուցաբերում են՝ առցանց կապով խորհրդակցելով ՀՀ մասնագետների հետ: Այս մասին հայտնում է  ԱՀ առողջապահության նախարարությունը։ 

«Հետքի» հետ զրույցում Արցախի ԱՆ մամուլի խոսնակ Անգելինա Իսախանյանն ասաց, որ այս պահին դեռևս հաջողվում է հինգ ծայրահեղ ծանր հիվանդների պատշաճ բուժօգնություն ցուցաբերել, սակայն ամեն պահի կարող է նրանց՝ Հայաստան տեղափոխելու անհրաժեշտություն առաջանա։

Արցախը Հայաստանին կապող միակ ճանապարհը Ադրբեջանի կողմից արգելափակելու պատճառով ԱՀ առողջապահության նախարարության ենթակայության տակ գործող բուժհաստատություններում չեղարկվել են պլանային վիրահատությունները։

Նախարարության փոխանցմամբ, առաջին բուժօգնության համար անհրաժեշտ դեղերի և բժշկական պարագաների պակաս այս պահին չկա, բայց մատակարարումը դադարեցված է: