Ներկայացման ընթացքում հանդիսատեսը երկու ժամով կտրվել էր իրական կյանքից և միայն վերջում՝ ծափերի ընթացքում, ծաղկեփնջի փոխարեն տոպրակով 2 կգ սոխը հիշեցրեց արդեն 10-րդ օրը շրջափակման մեջ գտնվող Արցախում՝ օրեցօր մեծացող պարենային ապրանքների դեֆիցիտը. 

Երեկ՝ դեկտեմբերի 21-ին, Ստեփանակերտի Շառլ Ազնավուրի անվան մշակույթի կենտրոնում տեղի ունեցավ Ստեփանակերտի ռուսական դրամատիկական թատրոնի Նադեժդա Պտուշկինայի  «Մինչ նա մահանում էր» (пока она умерала) ամանորյա կատակերգության բեմադրությունը:

Նախoրոք որոշված ներկայացման օրերը ոչ միայն չէին հետաձգվել դեկտեմբերի 12-ից մինչ օրս շրջափակման պատճառով, այլև էլ ավելի անհրաժեշտ էին դարձրել այն. իրավիճակով պայմանավորված` լարված, կրկնապատկված հոգսերով ստեփանակերտցիները հնարավորություն ստացան մի պահ կտրվել առօրյա հոգսերից, լիցքաթափվել և լիցքավորվել կատակերգույթունից:

Ներկայացումից առաջ դերասանները կատակել էին, որ ծաղկեփնջի փոխարեն հանդիսատեսը կարող է բերել  շրջափակման հետևանքով «էկզոտիկ» ապրանքատեսակ դարձած կարտոֆիլի, գազարի, սոխի փնջեր, ներկայացման վերջում  հանդիսատեսը արձագանքեց կատակին:

Ստեփանակերտի ռուսական դրամատիկական թատրոնը  ձևավորվել է այս տարի՝ Մեսրոպ Մաշտոց համալսարանի 2013 թվականից գործող ուսանողական թատրոնի հիմքի վրա, գեղարվեստական ղեկավար՝ Ժաննա Կրիկորովա: 

«Մինչ նա մահանում էր» (пока она умерала) ներկայացումը Ստեփանակերտում ցուցադրվելու է 4 օր, դեկտեմբերի 21, 22, 24, 25-ին: 

Արդեն 11-րդ օրն է՝ Արցախը շրջափակման մեջ է․ ադրբեջանցիները դեկտեմբերի 12-ից փակել են Արցախը Հայաստանին կապող միակ ճանապարհը, այդպիսով ստեղծել հումանիտար ճգնաժամ։

Գլխավոր լուսանկարը՝ Ծովինար Բարխուդարյանի. Կատակերգության վերջում դերասանուհի Տատյանա Միրզոյանը հանդիսատեսից ստացած իր  «ծաղկեփնջով»