Գլխավոր դատախազությունում ուսումնասիրել են Արաբկիր վարչական շրջանում «Տիտան օիլ» ՍՊԸ-ի կողմից ապօրինի շահագործվող բենզալցակայանի մասին «Հետքի» հրապարակումը։ Գլխավոր դատախազությունից մեր հարցմանն ի պատասխան հայտնեցին, որ հրապարակումն ուղարկվել է իրավասու քննչական մարմին քրեական վարույթ նախաձեռնելու հարցը լուծելու համար։

• Պետական կառույցները չեն կարողանում փակել ապօրինի գործող բենզալցակայանը

Հրաչյա Քոչար փողոցում գործող բենզալցակայանի գործունեությունը դադարեցնելու մասին կարգադրագիր էր ստորագրել վարչապետին ենթակա Քաղաքաշինության, հրդեհային տեսչական մարմնի ղեկավար Գարեգին Խաչատրյանը։ Կարգադրագիրը ստորագրելուց անցել է 1 ամսից ավելի ժամանակ, սակայն բենզալցակայանը անխոչընդոտ շահագործվում է։ Տեսչական մարմնի ղեկավարը մի շարք խախատումների մասին է գրել իր կարգադրագրում։ Գլխավոր խախտումն այն է, որ «Տիտան» ապրանքային նշանով շահագործվող բենզալցակայանի պահեստային տարաները գտնվում են բենզալցակայանի տանիքին այն դեպքում, երբ Հայաստանում արգելված է բենզալցակայանների պահեստային տարաների վերգետնյա գործածումը։

«Գլխավոր դատախազության կողմից նշված հրապարակումը, ինչպես նաև շահագրգիռ փաստաբանի կողմից ներկայացված համապատասխան փաստաթղթերը, ՀՀ քրեական դատավարության օրենսգրքի 178-րդ հոդվածով սահմանված կարգով, ուղարկվել է իրավասու քննչական մարմնի ղեկավարին՝ «Տիտան Օիլ» ՍՊ ընկերության կողմից բենզալցակայանի շահագործման, ինչպես նաև դրա գործունեության հետ կապված իրավասու պաշտոնատար անձանց կողմից թույլ տրված առերևույթ ապօրինությունների դեպքերի վերաբերյալ քրեական վարույթ նախաձեռնելու հարցը լուծելու համար»,- հայտնեցին Գլխավոր դատախազությունից։