Ազգային անվտանգության ծառայությունն (ԱԱԾ) առաջարկում է պետական սահմանի պահպանության, օպերատիվ-հետախուզական գործու­նեու­թյան իրականացման կամ հատուկ առաջադրանքների կատարման գոր­ծա­ռույթներ ունեցող ծառայողների համար սահմանել պարտադիր ատեստավորում, որի արդյունք­ներով կհաշվարկվի նաև աշխատավարձի հավելավճար։ Օրենքի նախագծերի փաթեթը ԱԱԾ-ն շրջանառության մեջ է դրել իրավական ակտերի նախագծերի հրապարակման միասնական կայքում։

Ներկայացված նախագծերի համաձայն՝ առաջարկվում է հավելավճար հաշվարկելու նպատակով ատես­տա­վորումն իրականացնել պար­­տադիրության սկզբունքով, ինչը, ըստ ԱԱԾ-ի, կխթանի համապատասխան ստորաբաժանումների ծա­ռա­յող­ների մոտ պատշաճ մասնագիտական պատրաստվածության ապահովմանը և պահ­պան­մա­նը: 

Այն ծառայողներին, որոնց համար ատեստավորման արդյունք­նե­րով հաշ­վարկ­վել է հավ­ե­լա­վճար, այն կվճարվի 3 տարի ժամկետով, իսկ հավելավճարի վճարումը շա­րու­նակ­վելու հա­մար՝ ծառայողը ստիպված կլինի անցնել նոր ատեստավորում: 

Միաժամանակ, ատեստավորման արդյունքներով հա­վե­լավճար ստանալու կամ հավե­լավճա­­րի հաշվարկումը շարունակելու իրավունք ձեռք չբերած ծա­ռայողը նոր ատես­տա­վորում անց­նելու համար մեկ տարվա ընթացքում կկարողանա դիմել ոչ ավելի, քան երկու անգամ, որի արդ­յունք­նե­րով հավելավճար ստա­նալու իրավունք ձեռք բերելու դեպքում հա­վե­լավճարը կհաշ­վարկվի այդ իրավունքի ձեռք­բերման օրվանից: 

Իսկ երկրորդ անգամ նոր ատեստա­վո­րման արդյունքներով հա­վե­լավճար ստա­նա­լու իրավունք ձեռք չբերած ծա­ռայողները կա­զ­ատ­­­վեն զբաղեցրած համապատասխան պաշ­տոնից և կթողնվեն կադրերի տրամադրության տակ մինչև 2 ամիս ժամկետով:

Ինչպես ասվում է նախագծի հիմնավորման մեջ, հաշվի առնելով այն հանգամանքը, որ Ազգային անվտան­գության ծառայության սահմանապահ զոր­քերը փու­լային տարբերակով Պաշտպանության նախարա­րու­թյու­նից ընդունելու են հայ-ադրբե­ջա­նա­կան պե­տական ամբողջ սահմանի պահպանությունը՝ անհրաժեշտ է ԱԱԾ-ն համալրել որակյալ և բանիմաց կադրերով՝ գրավիչ դարձ­նե­լով ծառայությունն ազ­գային անվտան­գության մարմիններում։

Հավելենք, որ այս նախագծերի փաթեթն օրինական ուժ ստանալու համար նախ պետք է արժանանա կառավարության հավանությանը, ապա ընդունվի նաև Ազգային ժողովի կողմից։

Լուսանկարը՝ ԱԱԾ պաշտոնական կայքից