Ուկրաինայում ռուսական զորքերի միացյալ խմբավորման նոր հրամանատար է նշանակվել Ռուսաստանի զինված ուժերի գլխավոր շտաբի պետ Վալերի Գերասիմովը։ Այդ մասին հայտնում է РИА Новости-ն՝ հղում անելով ՌԴ պաշտպանության նախարարությանը։ Գերասիմովը ՌԴ ԶՈւ ԳՇ պետի պաշտոնը զբաղեցնում էր 2012 թվականի նոյեմբերից։

Սերգեյ Սուրովիկինը, որը նախկինում գլխավորում էր Ուկրաինայում ռուսական զորքերը, նշանակվել է Գերասիմովի տեղակալ։ Գերասիմովի տեղակալներ են նշանակվել նաև ցամաքային զորքերի հրամանատար Օլեգ Սալյուկովը և Գլխավոր շտաբի պետի տեղակալ Ալեքսեյ Կիմը։

Ռուսաստանի պաշտպանության նախարարությունից հայտնել են, որ «հատուկ գործողության ղեկավար կազմի մակարդակի բարձրացումը» կապված է լուծվող խնդիրների մաստշաբների ընդլայնման, ինչպես նաև զորքերի տարբեր տեսակների ավելի սերտ փոխգործակցություն կազմակերպելու անհրաժեշտությամբ:

Գեներալ Սուրովիկինը նախորդ տարվա հոկտեմբերին էր նշանակվել Ուկրաինայում ռուսական զորքերի միացյալ խմբավորման հրամանատար։ Նա այդ պաշտոնին նշանակված առաջին մարդն էր, որի նշանակման մասին ՌԴ ՊՆ-ն հանրայնորեն էր հայտարարել։ Սուրովիկինի օրոք ռուսական բանակը նահանջեց Խերսոնից։ Գեներալն այդ որոշումը «ծանր» էր անվանել, սակայն հայտարարել, որ դա կփրկի ռուսաստանցի զինվորների կյանքերը։

Լուսանկարը՝ ՌԴ ԶՈւ մամուլի ծառայության