Լեռնային Ղարաբաղի նախադպրոցական հաստատությունների շուրջ 6000, հանրակրթական դպրոցների շուրջ 19 000 աշակերտներ, բուհերի շուրջ 6800 ուսանողներ արդեն մեկ ամիս զրկված են 21-րդ դարի ամենակենսական իրավունքներց մեկից՝ կրթության իրավոււնքից։ Այս մասին Կառավարության հունվարի 26-ի նիստի մեկնարկին հայտնեց վարչապետ Նիկոլ Փաշինյանը։

Ըստ նրա՝ վերջին անգամ նման բան եղել էր 44-օրյա պատերազմի ժանանակ։

«Իսկ այն իրավիճակում, երբ հրանոթները չեն կրակում, կրթական հաստատությունները փակվել էին միայն կորոնավիրուսի համավարակի պատճառով։

Այս անգամ, սակայն, Քովիդ 19-ի վիրուսը չէ կրթական հաստատությունների չաշխատելու պատճառն, այլ՝ Ադրբեջանի չակերտավոր բնապահպանական մտահոգությունները։ Չբավարարվելով Լաչինի միջանցքը փակելով՝ Ադրբեջանը փակում է նաև ԼՂ-ն սնուղոց գազի խողովակը, հետո բացում 10 %-ով, հետո նորից փակում, հետո բացում, ասենք, 25 %-ով և այսպես շարունակ»,- ասաց վարչապետը։

Փաշինյանը նշեց՝ մանկապարտեզները չեն աշխատում նաեւ սննդի բացակայության պատճառով, որն նույնպես միջանցքի փակման հետեւանք է։

Լեռնային Ղարաբաղի կյանքի ճանապարհը՝ Լաչինի միջանցքը, որը սահմանվել է եռակողմ հայտարարությամբ և որի անխափան գործողության երաշխիքներ են տվել Ադրբեջանի Հանրապետությունը և Ռուսաստանի Դաշնությունը, փակ է արդեն 46 օր։ Արդեն 46 օր ԼՂ բնականոն կյանքը խաթարված է, և հումանիտար ճգնաժամը ծավալվում է ամբողջ թափով։

ԼՂ-ում էլեկտրական հոսանքի հովհարայաին անջատումներ են, որովհետև Ադրբեջանը խափանել է նաև ԼՂ-ն հոսանքով ապահովող գծերի աշխատանքը, բնակչությանը էլեկտրական հոսանք է մատակարարվում միայն տեղի էլեկտրակայանների արտադրական հզորությունների հաշվին, ինչը բավարար չէ։ Բնակչությանն առաջին անհրաժեշտության ապրանքներ մատակարարվում են կտրոնային համակարգով։

«Այս ամենով Ադրբեջանի իշխանությունը մի նպատակ է հետապնդում՝ կոտրել սեփական հայրենիքում ապրելու՝ ԼՂ հայության կամքը։ Ընդ որում, մեր ունեցած տեղեկություններով՝ Բաքվի պլանը հետևյալն է. ԼՂ-ում տնտեսական, հոգեբանական ճնշումը հասցնել ինչ-որ մի կուլմինացիոն կետի, դրանից հետո մի քանի օրով բացել միջանցքը՝ ակնկալիքով, որ ԼՂ հայերը զանգվածաբար կլքեն իրենց տները, կրկին փակել միջանցքը, և հետո կրկին մի քանի օրով բացել, և այսպես այնքան, մինչև վերջին հայը կլքի Լեռնային Ղարաբաղը»,- ասաց Նիկոլ Փաշինյանը։

Կառավարության ղեկավարն արձանագրեց՝ սա էթնիկ զտման բացահայտ քաղաքականություն է, և եթե մինչ այս միջազգային հանրությունը թերահավատությամբ էր վերաբերվում ԼՂ հայությանն էթնիկ զտումների ենթարկելու՝ Ադրբեջանի մտադրությունների մասին ահազանգերին, հիմա արդեն «այս ընկալումը դանդաղ, բայց հաստատուն քայլերով միջազգային հանրության շրջանում ավելի է ուժեղանում»։

Նիկոլ Փաշինյանի խոսքով՝ այս առումով դեր ունեցավ նաև հունվարի 17-ին խաղաղապահների ուղեկցությամբ ԼՂ վերադարձող երեխաներին ադրբեջանցի դիմակավորված, «բնապահպանական ակտիվիստների» կողմից ահաբեկելու տեսանյութը, որը հենց իրենք՝ ադրբեջանցիներն էին տարածել, և որն, ըստ նրա, աշխարհում լայնորեն տարածվեց։

«Բայց ԼՂ հայությանն իրենց տներից արտաքսելը Ադրբեջանի միակ նպատակը չէ։ Այս սադրիչ գործողություններով Ադրբեջանը նպատակ ունի նաև խափանել խաղաղության օրակարգը, խաղաղության բանակցային գործընթացը և նոր պատերազմ հրահրել տարածաշրջանում։ 

Հասկանալի է, որ Լաչինի միջանցքի փակման և ԼՂ հումանիտար ճգնաժամը մենք բոլորս շատ էմոցիոնալ ենք տանում, բայց պիտի կրկին ընդգծեմ իրավիճակի շուրջ զսպվածության անհրաժեշտությունը և խաղաղության օրակարգին հակասող բառապաշարի և գործողությունների բացառումը, առավել ևս՝ պետական իշխանության ներկայացուցիչների կողմից։ Շարունակում ենք հետևողական լինել խաղաղության օրակարգի առաջմղման ջանքերում»,- հայտնեց վարչապետը։

Ըստ նրա՝ արդեն երկար ժամանակ Ադրբեջանը փորձում է միջազգային հանրությանը համոզել, որ Լաչինի միջանցքն ամենևին էլ փակ չէ, գազամատակարարումն ու հոսանքի մատակարարումը դադարեցված չեն։

«Այս հակասությունը դե յուրե լուծելու լավագույն ձևը ԼՂ և Լաչինի միջանցք միջազգային փաստահավաք առաքելություն գործուղելն է, և մենք հետևողականորեն պիտի աշխատենք այս ուղղությամբ։

Մեր տարածաշրջանում առկա բոլոր խնդիրների խաղաղ կարգավորումն այլընտրանք չունի, և մենք առաջնորդվելու ենք հենց այս տրամաբանությամբ, ինչքան էլ հասկանում ենք դժվարություններն ու բարդությունները»,- եզրափակեց Փաշինյանը։