Գլխավոր դատախազության պետական շահերի պաշտպանության վարչությունում ուսումնասիրվում է Երևանի մայթերին և այլ հանրային տարածքներում ապօրինի տեղադրված վճարային տերմինալների մասին «Հետքի» հրապարակումը։

• Երևանի մայթերին տերմինալներն ապօրինի են տեղադրված․ համայնքը զրկվում է միլիոնավոր դրամների մուտքերից

Այս մասին մեր գրավոր հարցմանն ի պատասխան՝ հայտնել է գլխավոր դատախազությունից։ Դատախազությունում ուսումնասիրվում է նաև նույն հրապարակման մեջ տեղ գտած այն հանգամանքը, որ տերմինալ շահագործող ընկերություններից մեկը պատկանում է Երևան քաղաքի Ավան և Նոր Նորք վարչական շրջանների դատախազ Վիգեն Միլիտոնյանի կնոջն ու զոքանչին։

«Հետք»-ն ուսումնասիրել էր Երևան քաղաքում վճարային տերմինալների տեղադրման օրինականությունը, տեղադրման հիմքերը և պարզել, որ մայթերը, գետնանցումները, հանրային այլ տարածքները տնտեսական գործունեության նպատակով օգտագործող մի շարք ընկերություններ Երևան քաղաքին վարձավճար չեն տալիս (որոշ վերապահումներով՝ բացառությամբ մեկից):

2022 թ․ Երևանի մայթերին ապօրինի տեղադրված տերմինալների կողքին ավելացան ևս մեկ ընկերության տերմինալներ։ Նոր տերմինալները պատկանում են «Ֆաստշիֆթ» ՍՊԸ-ին, որի բաժնետերերը «Վիվառո» ընկերության հիմնադիրներն են և վայելում են գործող իշխանությունների աջակցությունը։

Լուսանկարը՝ Սարո Բաղդասարյանի