Պաշտպանության նախարարությունն մտադիր է 2023 թվականի ապրիլի 10-ից մինչև հուլիսի 31-ը հայտարարել ամառային զորակոչ։ Կառավարության այս որոշման նախագիծը շրջանառության մեջ է դրվել իրավական ակտերի նախագծերի հրապարակման միասնական կայքում։

2023 թվականի ապրիլի 10-ից մինչև հուլիսի 31-ը կանցկացվի արական սեռի այն քաղաքացիների շարքային կազմի պարտադիր զինվորական և այլընտրանքային ծառայությունների ամառային զորակոչը, որոնց 18 տարին լրանում է մինչև 2023 թվականի հունիսի 30-ը ներառյալ, ինչպես նաև այն քաղաքացիների, որոնց շարքային կազմի պարտադիր զինվորական ծառայության զորակոչից նախկինում տրված տարկետումը դադարում է մինչև 2022 թվականի հունիսի 30-ը ներառյալ:

Պաշտպանության նախարարության ներկայացրած նախագծի համաձայն՝ բուն ամառային զորակոչը կմեկնարկի 2023թ․ հունիսի 26-ից և կավարտվի 2023թ․ հուլիսի 31-ին, իսկ զինծառայողների զորացրումը կմեկնարկի 2023-ի հունիսի 15-ին և կավարտվի 2023-ի հուլիսի 31-ին։ Վերը նշված ավելի վաղ ժամկետները վերաբերում են ամառային զորակոչի նախապատրաստական աշխատանքենրին, որը կիրականացնի հանրապետական զորակոչային հանձնաժողովը։

Հավելենք, որ այս նախագիծն ուժի մեջ կմտնի միայն Կառավարության հավանությանն արժանանալուց հետո։