«Դու և աշխարհը»: Այսպես է կոչվում այն նախաձեռնությունը, որն այսօր ԲարՔեմփի ժամանակ ներկայցրեցին Դավիթ Աբգարյանը, Ավա Քոչարյանը և Մարիամ Դիլբանդյանը: Երիտասարդներն իրենց առջև նպատակ են դրել փոխել իրենց շրջապատող աշխարհը, և փոխել այն դեպի լավը: Նրանք ստեղծել են իրենց կայքը` youandworld.am, որտեղ տեղադրում են հոդվածներ հաջողության, բիզնես-կառավարման, կին-տղամարդ հարաբերությունների մասին, հաջողակ պատմություններ հայտնի մարդկանց կյանքից:

Մարիամը հոգեբան է և կարծում է, որ ամեն ինչի հիմքում մարդկային հարբերություններն են: Կարելի է ավելի մեծ հաջողությունների հասնել, եթե աշխատես թիմով: Նրա կարծիքով` հայ հասարակության մեջ դեռ կա խորհրդային մտածողությունը, ինչի արդյունքում մարդիկ նախաձեռնող չեն, սակայն կան տիրույթներ, որոնք ազատ են, ոչինչ դեռ արված չէ, և հնարավոր է փորձել այդ բացը լրացնել:

Նրանք նպատակ ունեն հաջողության գաղափարը տարածել հայ հասարակության մեջ, մարդկանց մոտիվացնել, օգնել հասնել ինքնաճանաչման, լինել մրցակցային և ուժեղ, և դա այժմ փորձում են իրականացնել իրենց հոդվածների միջոցով: Հոդվածների մեծ մասն էլ կազմում են հոգեբանական նյութերը: Հոգեբանության միջոցով կարելի է ստեղծել նաև հաջողակ բիզնես:

Նրանք նաև փորձում են այդ հոդվածները գրել մատչելի և գրագետ հայերենով: Կայքի այցելությունների 75%-ը գալիս է «Ֆեյսբուք» սոցիալական ցանցից, իսկ նրանց հիմնական մասը կազմում են 18-24 տարեկան երիտասարդները:

Երիտասարդները համոզված են, որ փոքր քայլերով առաջ են գնում, բայց ժամանակի ընթացքում կկարողանան հասնել մեծ արդյունքի և իրականացնել նաև իրենց մյուս ծրագրերը:

Անցած տարի ԲարՔեմփում հաղթող ճանաչվեց ԱրմՔոմեդի նախագծի պրեզենտացիան: Այս տարի նրանք պրեզենտացիա չունեին, սակայն նախագիծը ներկայացնող Նարեկ Մարգարյանը կարծում է, որ ԲարՔեմփը հնարավորություն է տալիս ընկերական, ազատ միջավայրում քննարկել ոլորտի տարբեր թեմաներ, ինչպես նաև նոր գիտելիքներ ստանալ: Նրա խոսքերով` սոցցանցում իրականում այնքան մարդ չէ ընդգրկված, որքան թվում է, սակայն այժմ այդ մարդկանց թիվն աստիճանաբար ավելանում է: Իսկ դա հնարավորություն է տալիս մարդկանց լինել ավելի տեղեկացված, գործել կազմակերպված ու նպատակային, մասնակից դառնալ տարբեր ակցիաներ, որոնց միջոցով հնարավոր է հասնել ցանկալի փոփոխության:

Այսօր ԲարՔեմփի երկրորդ և վերջին օրն էր: Նախորդ օրը գրանցվել է շուրջ 800 մասնակից, իսկ այսօր նրանց թիվը եղել է ավելին: Կազամկերպիչներից բլոգեր Անի Սմբատյանի համար ԲարՔեմփը հետաքրքիր է, քանի որ հնարավորություն է տալիս տեղեկանալ վերջին մեկ տարվա ընթացքում Հայաստանի վիրտուալ աշխարհի նորություններին՝ ՏՏ նախարարության ստեղծում, լայքամանիա, google-ի նորությունները, խաղաֆիկացիա, սոցիալական մեդիա, օնլայն գնումներ և այլն: Բացի այդ` այն մարդկանց, ում նա ամեն օր տեսնում է օնլայն, այստեղ կարող է տեսնել, շփվել կենդանի, լսել նրանց պրեզենտացիաները: Իսկ ԲարՔեմփի ազատ ֆորմատը հնարավորություն է տալիս քվերակել ոտքերով. պարտադրված չես լսել որևէ մեկին, և եթե պրեզենտացիան հետաքրքիր չէ, վեր ես կենում և գնում այլ լսարան:

«Սա ստեղծում է նաև յուրահատուկ մրցակցություն. որքան հետաքրքիր պրեզենտացիա, այնքան շատ մարդ, որքան շատ մարդ, այնքան դու հայտնի ես», - ասում է Անին:

Նա ուրախ է, որ այս տարի ԲարՔեմփը շատ ավելի կայացած էր, և որ կազմակերպիչներից ոչ ոք աշխատավարձ չի ստացել. ամեն ինչ արվել է կամավորական սկզբունքներով: Անիի խոսքերով` ԲարՔեմփը տևում է երկու օր, բայց դրա վրա աշխատում են ամիսներ: Նա նշեց, որ այս տարի եղել է շուրջ 30 կամավոր, որոնք անցել են հատուկ դասընթացներ և հետևում էին, որ չլինեն գովազդային բնույթի պրեզենտացիաներ, հետևում էին պրեզենտացիաների  ժամանակին, քանի որ այստեղ գործում է հստակ ժամանակացույց:

«Ինտերնյուս»-ը ներկայացնող Գեղամ Վարդանյանը ևս նշեց, որ այս տարի կամավորների թիվը շատ ավելին էր, ընդ որում` գերակշռում էին աղջիկները: Այս տարի պրեզենտացիաներին զուգահեռ փորձել են կազմակերպել նաև դասընթացներ, և լսարանների թիվը ոչ թե 3 էր, այլ 4:

Գ. Վարդանյանի խոսքերով` այս տարի կազմակերպիչները փորձել են ավելի շատ ուշադրություն դարձնել նաև պրեզենտացիաների որակի, բովանդակության վրա, որպեսզի դրանք լինեն ավելի հետաքրքիր, ոչ գովազդային, ուսուցողական և գիտելիք փոխանցող: